Նախագահ Բաշար Ալ-Ասադի այցը ԱՄԷ տեղավորվում է սիրիական ճգնաժամում ԱՄԷ-ի դերի ամրապնդման տրամաբանության մեջ: Նման համոզմունք է հայտնել ԱՄԷ նախագահի դիվանագիտական խորհրդական Անվար Գարգաշը:
«Տարածաշրջանային բարդ պայմանները պահանջում են պրակտիկ և տրամաբանական մոտեցումներ մշակել, որոնք կմերժեն արաբական երկրների մեկուսացումը և կդիմակայեն մարտահրավերներին»,- Twitter-ի իր էջում գրել է ԱՄԷ-ի պաշտոնյան:
Գարգաշը հավաստիացրել է, որ ԱՄԷ-ն շարունակում է իրատեսական քաղաքականություն վարել տարածաշրջանում ճնշումների թուլացման և ճգնաժամերի լուծման շրջանակներում արաբական դերի ամրապնդման ուղղությամբ:
Նշենք, որ Սիրիայի նախագահ Բաշար Ալ-Ասադը պաշտոնական այցով մեկնել էր ԱՄԷ: Նա հանդիպել էր ԱՄԷ-ի փոխնախագահ, վարչապետ և Դուբայի կառավարիչ շեյխ Մուհամմադ բըն Ռաշիդ Ալ-Մաքթումի հետ, ով ընդգծել է, որ ԱՄԷ-ն ցանկանում է կառուցողական համագործակցության նոր ուղիներ բացահայտել։
Ասադը հանդիպել է նաև Աբու Դաբիի թագաժառանգ շեյխ Մուհամմադ բըն Զայեդ Ալ-Նահյանի հետ: Կողմերը հանդիպման ընթացքում քննարկել են մի շարք հարցեր՝ կարևորելով Սիրիայի տարածքային ամբողջականությունը և օտարերկրյա ուժերի դուրսբերման անհրաժեշտությունը:
Հատկանշական է, որ 2011 թվականին բռնկված սիրիական ճգնաժամի մեկնարկից ի վեր Բաշար Ալ-Ասադի այցն ԱՄԷ առաջին պաշտոնական այցն է որևէ արաբական երկիր: ԱՄԷ-ն 2018 թվականին վերաբացել է իր դիվանագիտական ներկայացուցչությունը Դամասկոսում 12-ամյա դադարից հետո:
Հետևեք մեզ տելեգրամում
