Ժամանակն է, որ Էրդողանը փոխի իր արտաքին քաղաքականությունն ու խզի ահաբեկիչների հետ կապերը: Նման կարծիք է արտահայտվել Իրանի ԻՀՊԿ-ին հարող «Fars» լրատվական գործակալության հրապարակած՝ «Թուրքիան և ահաբեկչական խմբավորումները» վերնագրով հոդվածում:
Հոդվածում անդրադարձ է կատարվել Սիրիայի ահաբեկչական խմբավորումների հետ Անկարայի համագործակցությանը:
Ընդգծվել է, որ Սիրիայի հյուսիսում տեղակայված ահաբեկչական խմբավորումներից զատ՝ Թուրքիան անմիջական կապի մեջ է եղել նաև «Իսլամական պետություն» ահաբեկչական կազմակերպության հետ, իսկ արևմուտքից ԻՊ-ին անդամագրված շատ ահաբեկիչներ այդ կազմակերպությանն են միացել հենց Թուրքիայի միջոցով։
Հոդվածում շեշտադրվել է, որ Թուրքիան ցանկանում է ահաբեկչական խմբավորումների աջակցությամբ վերանվաճել Օսմանյան կայսրության վերահսկողության տակ եղած նախկին տարածքները, սակայն ժամանակն է, որ Էրդողանը փոխի իր արտաքին քաղաքականությունն ու խզի ահաբեկիչների հետ կապերը:
Անդրադարձ է կատարվել նաև Սիրիայի նախագահ Բաշար Ալ-Ասադի առաջին պաշտոնական այցին ԱՄԷ: Հոդվածում նշվել է, որ այդ այցը մեծ ցնցում էր Էրդողանի համար, քանի որ նա վերջին տարիներին իր ողջ ռեսուրսները ծախսել է ահաբեկչական խմբավորումների աջակցությամբ Բաշար Ալ-Ասադի իշխանությունը տապալելու վրա։
Հետևեք մեզ տելեգրամում
