Վրաստանի նորանշանակ արտգործնախարար Իլիա Դարչիաշվիլին հանդիպել է թուրք պաշտոնակից Մևլութ Չավուշօղլուի հետ ՆԱՏՕ-ի արտաքին գործերի նախարարների հանդիպման շրջանակներում:
Հանդիպմանը նախարարներն ընդգծել են երկու երկրների միջև սերտ բարեկամությունն ու ռազմավարական գործընկերությունը, պատրաստակամություն են հայտնել ակտիվորեն համագործակցել վրաց-թուրքական հարաբերությունների հետագա զարգացման համար։
«Նշվել է Թուրքիայի ամուր աջակցությունը Վրաստանի եվրատլանտյան ինտեգրմանը և մեր երկրի ինքնիշխանությանն ու տարածքային ամբողջականությանը։ Հանդիպման ընթացքում քննարկվել են ուկրաինական ճգնաժամը և տարածաշրջանում անվտանգության ծանր միջավայրը։ Նախարարները նշել են բանակցային գործընթացում Թուրքիայի հատուկ դերը և այդ ուղղությամբ Անկարայի հետագա ջանքերը։
Կողմերը պատրաստակամություն են հայտնել աշխատել երկրների միջև բարձր մակարդակի այցերի փոխանակման և վրաց-թուրքական ռազմավարական խորհրդի նիստ կազմակերպելու ուղղությամբ։ Շեշտը դրվել է նաև երկու երկրների միջև հաջող առևտրատնտեսական կապերի և այս ոլորտում համագործակցության հետագա խորացման անհրաժեշտության վրա»,- նշված է Վրաստանի արտգործնախարարության հաղորդագրության մեջ։
Մևլութ Չավուշօղլուն իր հերթին հաջողություն է մաղթել Վրաստանի արտաքին գործերի նախարարին հետագա գործունեության մեջ։
Հետևեք մեզ տելեգրամում
