Լիբանանի վարչապետ Նաջիբ Միկաթին և Քուվեյթի արտգործնախարար Ահմեդ Նասեր Ալ-Մուհամմադ Ալ-Սաբահը հեռախոսազրույց են ունեցել, որի ընթացքում քննարկել են Լիբանանի և Պարսից ծոցի երկրների միջև հարաբերությունները՝ վերջին դրական զարգացումների ֆոնին:
Հեռախոսազրույցի ընթացքում Քուվեյթի արտգործնախարարն ընդգծել է, որ Պարսից ծոցի երկրներն անհամբեր սպասում են Լիբանանի կայունացմանն ու վերականգնմանը:
Շեյխ Ալ-Սաբահը շեշտել է, որ Քուվեյթն ու Լիբանանը միավորող կապերը շատ ամուր կապեր են՝ ընդգծելով, որ Քուվեյթը ջանք չի խնայի Բեյրութին աջակցելու համար:
Իր հերթին Միկաթին շնորհակալություն է հայտնել Քուվեյթին մշտական աջակցության համար՝ նշելով, որ այդ «ջանքերը գնահատվում են լիբանանցիների կողմից»:
Հիշեցնենք, որ օրեր առաջ Սաուդյան Արաբիայի և Քուվեյթի դեսպանները վերադարձել էին Բեյրութ 5-ամսյա դադարից հետո: Նրանք հետ էին կանչվել Լիբանան-Պարսից ծոց դիվանագիտական ճգնաժամի պատճառով: Ճգնաժամի պատճառ դարձավ Լիբանանի տեղեկատվության նախարար Ժորժ Կորդահիի քննադատությունը Եմենի պատերազմում Սաուդյան Արաբիայի քաղաքականության վերաբերյալ: Սաուդյան Արաբիան անմիջապես հետ կանչեց իր դեսպանին Բեյրութից: Ի աջակցություն թագավորության՝ Պարսից ծոցի որոշ երկրներ նույնպես հետ էին կանչել իրենց դեսպաններին: Ավելի ուշ՝ դիվանագիտական ճգնաժամի կարգավորման համար Քուվեյթը հանդես եկավ 12 մասից բաղկացած նախաձեռնությամբ:
Հետևեք մեզ տելեգրամում
