Ռուսաստանի արտաքին գործերի նախարարություն է կանչվել Մոսկվայում Իսրայելի դեսպան Ալեքսանդր Բեն Զվին Իսրայելի հակառուսական քաղաքականության պատճառով:
Նշենք, որ պաշտոնական Մոսկվան խիստ քննադատության է ենթարկել Երուսաղեմին ՄԱԿ-ի Մարդու իրավունքների խորհրդից Ռուսաստանին հեռացնելու օգտին քվեարկելու և Լապիդի հակառուսական մեկնաբանությունների համար:
«Մենք նկատեցինք ապրիլի 7-ին արտգործնախարար Յաիր Լապիդի կողմից իրականացված ևս մեկ հակառուսական հարձակում՝ ՄԱԿ-ի Գլխավոր ասամբլեայի կողմից ՄԱԿ-ի Մարդու իրավունքների խորհրդին Ռուսաստանի անդամակցությունը կասեցնելու վերաբերյալ իր երկրի աջակցության համատեքստում»,- ուրբաթ հայտարարություն է տարածել ՌԴ ԱԳՆ-ը:
Համաձայն հայտարարության՝ Իսրայելի նման վարքագիծը փորձ է՝ օգտվել Ուկրաինայի շուրջ ստեղծված իրավիճակից, որպեսզի միջազգային հանրության ուշադրությունը շեղվի չլուծված ամենահին հակամարտություններից մեկից՝ պաղեստինա-իսրայելականից:
«Ինչպես գիտեք, խախտելով Անվտանգության խորհրդի և ՄԱԿ-ի Գլխավոր ասամբլեայի բազմաթիվ որոշումներ՝ Իսրայելի կառավարությունը շարունակում է պաղեստինյան տարածքների անօրինական օկուպացիան և «սողացող բռնակցումը», ինչի արդյունքում Հորդանան գետի Արևմտյան ափի ավելի քան 2,5 միլիոն պաղեստինցի այսօր ապրում է արտաքին աշխարհից կտրված անկլավներում: Գազայի հատվածը, ըստ էության, վերածվել է «բացօթյա բանտի», որի երկու միլիոն բնակչությունը ստիպված է եղել գոյատևել գրեթե 14 տարի Իսրայելի կողմից սահմանած ծովային, օդային և ցամաքային շրջափակման պայմաններում»,- ասվում է հայտարարության մեջ։
Իսրայելի արտգործնախարարությունը հրաժարվել է մեկնաբանել իր դեսպանի կանչվելը ՌԴ ԱԳՆ կամ վերոնշյալ հայտարարությունը:
Հիշեցնենք, որ ավելի վաղ Իսրայելի ԱԳ նախարար Յաիր Լապիդը Ռուսաստանին մեղադրել էր պատերազմական հանցագործություններ կատարելու մեջ:
Հետևեք մեզ տելեգրամում
