Իսլամական հեղափոխության պահապանների կորպուսի (ԻՀՊԿ) ռազմածովային ուժերի հրամանատար, կոնտրադմիրալ Ալիռեզա Թանգսիրին հաստատել է գեներալ-լեյտենանտ Ղասեմ Սոլեյմանիի սպանության համար վրեժ լուծելու Իրանի վճռականությունը, հայտնում է Fars-ը։
Նրա խոսքով՝ ամերիկացիները հաղորդագրություններ են ուղարկում Իրան՝ խնդրելով հրաժարվել լեգենդար գեներալի սպանության համար վրեժխնդրության իր երդումից։ Դրա դիմաց նրանք առաջարկում են չեղարկել Իրանի նկատմամբ պատժամիջոցները, ասել է նա՝ դա անվանելով «ցանկալին իրականի տեղ ընդունել»։
«Նրանք անընդհատ հաղորդագրություններ են ուղարկում, որ կառաջարկեն պարգեւներ եւ կհանեն որոշակի պատժամիջոցներ, եթե մենք հրաժարվենք Սոլեյմանիի համար վրեժխնդրությունից»,- ասել է Թանգսիրին:
«Բայց դա ցանկալին իրականի տեղ ընդունել է: Իսլամական հեղափոխության առաջնորդը վճռական է վրեժ լուծել, իսկ ԻՀՊԿ-ի հրամանատարը հայտարարել է, որ վրեժն անխուսափելի է»,- նշել է նա՝ հավելելով, որ «դրա ժամանակն ու տեղը» կորոշի Իրանը։
Իրանի Իսլամական հեղափոխության պահապանների կորպուսի (ԻՀՊԿ) «Ղուդս» ուժերի հրամանատար, գեներալ Սոլեյմանին 2020թ․ հունվարի 3-ին սպանվել էր Բաղդադի օդանավակայանում՝ ԱՄՆ նախկին նախագահ Դոնալդ Թրամփի հրամանով ամերիկյան անօդաչու թռչող սարքի հարձակման հետեւանքով։
Հետևեք մեզ տելեգրամում
