Ռուսաստանի արտգործնախարար Սերգեյ Լավրովը իտալական Mediaset հեռուստաալիքին տված հարցազրույցում Ուկրաինայի նախագահ Վոլոդիմիր Զելենսկուն համեմատել է Ադոլֆ Հիտլերի հետ:
Լավրովը նշել է, որ Ռուսաստանի պնդմամբ՝ Ուկրաինայի «ապաազգայնականացմանն» ուղղված գործողություններն ամենևին չեն հակասում Զելենսկու հրեական արմատներ ունենալու հանգամանքին:
««Նա (Զելենսկին) առաջ է քաշում հետևյալ փաստարկը.«Ի՞նչ նացիզմ կարող մեզ մոտ լինել, երբ ես հրեա եմ»: Գուցե սխալվում եմ, բայց կարծես թե Հիտլերը ևս հրեական արյուն ուներ: Դա բացարձակապես ոչինչ չի նշանակում։ Իմաստուն հրեա ժողովուրդն ասում է, որ ամենամոլի հակասեմականները սովորաբար հրեաներն են»,- հայտարարել է Լավրովը:
Լավրովի այս հայտարարությունը բողոքի ալիք է բարձրացրել Իսրայելում: Իսրայելում Ռուսաստանի դեսպան Անատոլի Վիկտորովը կանչվել է երկրի արտգործնախարարություն՝ Լավրովի հայտարարության համար բացատրագիր տալու համար:
«Սա աններելի և սկանդալային մեկնաբանություն է, պատմական սարսափելի սխալ և մենք ներողություն ենք ակնկալում»,- հայտարարել է Իսրայելի արտգործնախարար Յաիր Լապիդը:
«Հրեաներն իրենք իրենց չեն սպանել Հոլոքոստի ժամանակ: Հրեաներին հակասեմականության մեջ մեղադրելը ռասիզմի ամենաստոր մակարդակն է»,- հավելել է Լապիդը:
Հետևեք մեզ տելեգրամում
