Վրաստանի վարչապետ Իրակլի Ղարիբաշվիլին Եվրամիության պատվիրակության ղեկավար Կառլ Հարցելին է հանձնել Եվրահանձնաժողովի հարցաշարի առաջին մասը, որն արդեն լրացված է։ Այս մասին հայտնում է Վրաստանի կառավարությունը։
«Պատիվ ունեմ ձեզ տրամադրել Եվրահանձնաժողովի հարցաշարի մեր պատասխանները՝ նախապատրաստվելով ԵՄ-ին Վրաստանի անդամակցության դիմումի ավարտին»,- ասել է վարչապետը։
ԵՄ դեսպանը հաջողություն է մաղթել Վրաստանին և նշել, որ իր համար մեծ պատիվ է մասնակցել այս պատմական գործընթացին։
Վարչապետը նշել է, որ Վրաստանի կառավարությունը և բոլոր համապատասխան պետական գերատեսչությունները շարունակում են ինտենսիվ աշխատել հարցաշարի երկրորդ՝ ոլորտային մասի լրացման ուղղությամբ, որը ներառում է 33 գլուխ և մինչև 2300 հարց։ Իրակլի Ղարիբաշվիլիի խոսքով՝ Վրաստանի կառավարությունը ցանկանում է ժամանակից շուտ ԵՄ-ին հանձնել հարցաթերթիկի երկրորդ մասը, և գերատեսչությունները ջանք չեն խնայի։
Վրաստանի կառավարության տարածած պաշտոնական հաղորդագրության համաձայն, լրացված հարցաշարը ստանալուց հետո Եվրահանձնաժողովը կսկսի պատրաստել սեփական գնահատման զեկույցը, որը կներկայացնի Եվրամիության խորհրդին, իսկ որոշումը կկայացվի հավանաբար հունիսի վերջին։
Հետևեք մեզ տելեգրամում
