Իսրայելում Ռուսաստանի դեսպան Անատոլի Վիկտորովը «կոշտ խոսակցության» է առերեսվել, երբ կանչվել է երկրի արտգործնախարարություն՝ Լավրովի վերջին մեկնաբանության համար:
Այս մասին Իսրայելի հանրային Kan ռադիոյի հետ զրույցում հայտարարել է արտգործնախարար Յաիր Լապիդը: Սակայն նա այլ մանրամասներ չի հաղորդել՝ նշելով, որ դա հակասում է դիվանագիտական արարողակարգին:
Նշենք, որ այսօր Լապիդը կրկին դատապարտել է Լավրովի «հակասեմական» հայտարարությունը և կոչ է արել ներողություն խնդրել հրեաներից:
«Կարծում եմ Ռուսաստանի կառավարությունը պետք է ներողություն խնդրի հրեաներից: Դա սարսափելի հայտարարություն էր»,- ընդգծել է Լապիդը:
Ավելի վաղ տեղեկացրել էինք, որ Ռուսաստանի արտգործնախարար Սերգեյ Լավրովը իտալական Mediaset հեռուստաալիքին տված հարցազրույցում Ուկրաինայի նախագահ Վոլոդիմիր Զելենսկուն համեմատել էր Ադոլֆ Հիտլերի հետ:
Հիշեցնենք, որ Լավրովը հարցազրույցներից մեկում ասել էր. «Գուցե սխալվում եմ, բայց կարծես թե Հիտլերը ևս հրեական արյուն ուներ: Դա բացարձակապես ոչինչ չի նշանակում։ Իմաստուն հրեա ժողովուրդն ասում է, որ ամենամոլի հակասեմականները սովորաբար հրեաներն են»:
Հետևեք մեզ տելեգրամում
