Խորհրդարանական ընտրությունները Լիբանանում շարունակվում են

Լիբանանի արտաքին գործերի գերատեսչությունը հայտարարել է, որ արտերկրում բնակվող լիբանանցիների 60%-ը մասնակցել է խորհրդարանական ընտրություններին:

Մայիսի 9-ին ավարտվել է խորհրդարանական ընտրությունների երկրորդ փուլը, որին մասնակցել են Եվրոպայում, Աֆրիկայում, Կանադայում, Ավստրալիայում, ամերիկյան մայրցամաքում և ԱՄԷ-ում բնակվող լիբանանցիները։ Մինչդեռ առաջին փուլը տեղի էր ունեցել ուրբաթ, երբ քվեարկել են արաբական 9 երկրներում և Իրանում բնակվող լիբանանցիները։

Նշենք, որ 15 ընտրատարածքներում բաշխված են 103 ընտրական ցուցակներ՝ 718 թեկնածուներով, ովքեր պայքարում են 128 պատգամավորական մանդատների համար:

Լիբանանի արտգործնախարարության պաշտոնյան Reuters-ին ասել էր, որ ընտրություններին արտերկրի լիբանանցիների մասնակցության ընդհանուր թիվը կազմել է մոտ 60%՝ մոտավորապես 130,000 ընտրող (քվեարկելու իրավունք ուներ մոտ 225 հազար լիբանանցի): Սա գրեթե 3 անգամ գերազանցում է 2018 թվականի ընտրություններին:

Քվեարկության ավարտից հետո քվեատուփերը մասնավոր ընկերությունների միջոցով կուղարկվեն Լիբանանի կենտրոնական բանկ: Ձայները կհաշվարկվեն մայիսի 15-ին արդեն Լիբանանում ընտրությունների ավարտից հետո։