ԱՄՆ նախագահ Ջո Բայդենի վարչակարգի ճնշման ներքո Իսրայելը հստակեցրել է իր դիրքորոշումը պաշտոնական Մոսկվայի հետ հարաբերություններում՝ ներկայումս որդեգրելով ուկրաինամետ դիրքորոշում: Նման տեսակետ է ներկայացվել axios պարբերականում հրապարակված հոդվածում:
Իսրայելի պաշտպանության նախարարության գլխավոր տնօրեն Ամիր Էշելը երկու շաբաթ առաջ այցելել էր Վաշինգտոն՝ անվտանգության ոլորտում ԱՄՆ-Իսրայել համագործակցության շուրջ Պենտագոնի պաշտոնյաների հետ բանակցություններ վարելու համար:
Ըստ հոդվածի՝ ԱՄՆ պաշտպանության նախարարի քաղաքականության հարցերով տեղակալ Քոլին Քալը հանդիպել է Էշելի հետ և գործադրել Բայդենի վարչակազմի ջանքերը՝ ստիպելու աշխարհի երկրներին զենք մատակարարել Ուկրաինային:
Քալը Էշելին հարցրել էր՝ արդյոք Իսրայելը Գերմանիային թույլտվություն կտա «Spike» հակատանկային հրթիռները Ուկրաինային փոխանցելու համար: Նշենք, որ այդ դասի հրթիռներն արտադրվում են Գերմանիայում գտնվող իսրայելական գործարանում։ Լիցենզիայի համաձայն՝ Իսրայելը պետք է հաստատի ցանկացած հրթիռի փոխանցում երրորդ կողմին։
Իսրայելցի պաշտոնյան մերժել է Քալի խնդրանքն՝ ասելով, որ Իսրայելը Ուկրաինային միայն ոչ մահաբեր ռազմական տեխնիկա կտրամադրի։
Համաձայն հոդվածի՝ Էշելը նաև հայտնել է, որ Իսրայելը մտահոգված է, որ ռուս զինվորները կսպանվեն իսրայելական արտադրության զենքերից: Նման գործողությունները կարող են հանգեցնել նրան, որ Ռուսաստանը վնասի Իսրայելի անվտանգության շահերը Սիրիայում:
Հետևեք մեզ տելեգրամում
