Սաուդյան Արաբիան և Թուրքիան հայտարարել են «համագործակցության նոր դարաշրջան» բացելու իրենց վճռականության մասին՝ թագաժառանգ Մուհամմադ բն Սալմանի այցի ավարտին: Տեղեկությունը փոխանցում է սաուդական պաշտոնական Saudi Press Agency (SPA) լրատվական գործակալությունը:
Գործակալության տվյալներով՝ թագաժառանգը և Թուրքիայի նախագահ Ռեջեփ Թայիփ Էրդողանը պայմանավորվածություն են ձեռք բերել միասին աշխատել տարբեր ոլորտներում՝ այդ թվում քայլեր ձեռնարկել տնտեսության, էներգետիկայի և պաշտպանության ոլորտներում կապերի ամրապնդման ուղղությամբ:
Հանդիպման ընթացքում երկու ղեկավարները հաստատել են «իրենց վճռականությունը՝ ընդլայնելու համագործակցությունը երկկողմ հարաբերություններում, այդ թվում՝ քաղաքական, տնտեսական, ռազմական, անվտանգության և մշակութային ոլորտներում»։
«Երկու կողմերը հաստատեցին իրենց ջանքերը՝ ակտիվացնելու համագործակցությունը, համակարգումը և կարծիքների փոխանակումը տարածաշրջանային և միջազգային ասպարեզներում կարևոր հարցերի շուրջ՝ նպաստելով տարածաշրջանում անվտանգության և կայունության աջակցությանը և ամրապնդմանը, ինչպես նաև բոլոր ճգնաժամերի քաղաքական լուծումներին»,- նշել է գործակալությունը՝ հղում կատարելով համատեղ հայտարարությանը:
Ավելի վաղ տեղեկացրել էինք, որ Սաուդյան Արաբիայի թագաժառանգ Մուհամմադ բն Սալմանը տարածաշրջանային այց էր սկսել՝ մեկնելով Եգիպտոս և Հորդանան, ապա՝ Թուրքիա:
Հետևեք մեզ տելեգրամում
