Չնայած Հայաստանի և Արցախի դեմ Ադրբեջանի շարունակվող ագրեսիային, ԱՄՆ նախագահ Ջո Բայդենը հերթական անգամ շրջանցել է «Ազատության աջակցման ակտի» 907-րդ լրացումը՝ հնարավորություն տալով ԱՄՆ-ին ռազմական աջակցություն տրամադրել Ադրբեջանի կոռումպացված ռեժիմին: Տեղեկությունը հայտնում է Ամերիկայի Հայ դատի հանձնախումբը (ANCA)` այս հարցի առնչությամբ իր մտահոգությունը հայտնելով։
«Բայդենի որոշումը կանաչ լույս է վառում Ադրբեջանին հատկացվող ռազմական օգնության համար. հրաժարվելով 907-րդ հոդվածից` Ալիևին խրախուսում է շարունակել իր գործողությունները` հայ ռազմագերիների ազատությունից ապօրինի զրկել, Արցախի վրա մահաբեր հարձակումներ գործել և Հայաստանի ինքնիշխան տարածքը շարունակել բռնազավթել»,–ասել է Ամերիկայի Հայ դատի հանձնախմբի գործադիր տնօրեն Արամ Համբարյանը։
Նրա խոսքով` Հայ դատի հանձնախումբը կշարունակի աշխատել ԱՄՆ Սենատի և Ներկայացուցիչների պալատի ղեկավարների հետ, որպեսզի զրոյացնի Ադրբեջանին ԱՄՆ-ի կողմից տրամադրվող ռազմական օգնությունը և սահմանափակի 907-րդ հոդվածից հրաժարվելու` ԱՄՆ նախագահի լիազորությունները:
2020 թվականի հոկտեմբերի 14-ին իր նախընտրական քարոզարշավի ժամանակ դեռ նախագահի թեկնածու Բայդենը հայտարարել էր, որ ԱՄՆ–ն պետք է «ամբողջությամբ կատարի և չհրաժարվի օրենքի 907-րդ հոդվածի պահանջներից, որպեսզի կանգնեցնի ռազմական տեխնիկայի հոսքը Ադրբեջան»։
Համբարյանը նկատել է, որ Բայդենի գործողությունները հակասում են իրար, քանի որ 2021-ի ապրիլի 24-ին նա օգտագործեց «Ցեղասպանություն» տերմինը` ճանաչելով հայերի հանդեպ տեղի ունեցած ոճրագործությունը։ Իսկ այն ենթադրում էր չհրահրել Ադրբեջանին նման հանցագործությունը կատարելու համար։
Հավելենք, որ 2021-ի մայիսին ԱՄՆ-ի նախագահ Ջո Բայդենը երկարացրեց «Ազատության աջակցության ակտի» 907-րդ ուղղման կասեցումը, ինչը նշանակում է, որ թույլատրվելու է ԱՄՆ ուղիղ օգնությունն Ադրբեջանին։
907-րդ ուղղումը, որն ԱՄՆ Կոնգրեսն ընդունել է 1992 թվականին, սահմանափակում է Ադրբեջանին տրամադրվող օգնությունը՝ նախատեսելով միայն մարդասիրական աջակցություն: Այն ենթադրում է, որ ԱՄՆ-ն Ադրբեջանի կառավարությանը չպետք է աջակցություն տրամադրի, քանի դեռ այդ երկիրը քայլեր չի ձեռնարկել Հայաստանի և Արցախի դեմ շրջափակումներն ու ուժի կիրառման տարբերակները վերացնելու ուղղությամբ:2002թ․Կոնգրեսի կողմից 907-րդ բաժնում կատարած ուղղմամբ թույլատրվում է նախագահի կողմից ակտի կասեցումը և ռազմական աջակցության տրամադրումն Ադրբեջանին, ինչն էլ ամեն տարի անում է ԱՄՆ նախագահը:
Հետևեք մեզ տելեգրամում
