Թուրքիան կեղծ մեղադրանքներ է ներկայացնում Սիրիայի դեմ նոր ագրեսիայի նախապատրաստումն արդարացնելու համար։ Այս մասին հայտարարել է Սիրիայի նախագահ Բաշար Ալ-Ասադը Դամասկոսում Իրանի արտգործնախարար Հոսեյն Ամիր Աբդոլլահիանի հետ հանդիպման ժամանակ:
«Թուրքիայի ղեկավարությունը մոլորության մեջ է գցում համաշխարհային հանրությանը և փորձում է իրականության հետ կապ չունեցող անհեթեթ պատրվակներով արդարացնել Սիրիայի տարածք իր մոտալուտ ներխուժումը», – նշել է Ասադը:
Սիրիայի նախագահի խոսքով՝ Անկարայի գործողությունները միջազգային իրավունքի և ՄԱԿ-ի կանոնադրության, ինչպես նաև բարիդրացիության սկզբունքների կոպիտ խախտում են»:
Իր հերթին Իրանի արտգործնախարարն ընդգծել է, որ Թեհրանը դեմ է Սիրիայի հյուսիսում Թուրքիայի ռազմական հնարավոր գործողությանը և փորձում է ճգնաժամը լուծել դիվանագիտական ճանապարհով։
Աբդոլլահիանն ավելացրել է, որ իր այցը Դամասկոս նպատակ ունի հարթել Սիրիայի և Թուրքիայի միջև առկա տարաձայնությունները երկխոսության միջոցով:
Նա նաև դատապարտել է Իսրայելի «ագրեսիվ հարձակումները, որոնք խաթարում են Սիրիայի ինքնիշխանությունն ու տարածքային ամբողջականությունը»։
Հետևեք մեզ տելեգրամում
