Այսօր ԱՄՆ նախագահ Ջո Բայդենը և Իսրայելի վարչապետ Յաիր Լապիդը Երուսաղեմում ստորագրել են համատեղ ռազմավարական հռչակագիր, ըստ որի՝ ԱՄՆ-ը խոստացել է օգտագործել «իր ազգային հզորության ողջ ներուժը»՝ կանխելու Իրանին միջուկային տերություն դառնալը:
«Միացյալ Նահանգները ընդգծում է, որ այս խոստման անբաժան պարտավորությունն է երբեք թույլ չտալ Իրանին ձեռք բերել միջուկային զենք, իսկ ԱՄՆ-ը պատրաստ է օգտագործել իր ազգային հզորության ողջ ներուժը՝ այդ արդյունքն ապահովելու համար», – նշված է հռչակագրում, որը պաշտոնապես հայտնի է որպես «Երուսաղեմի՝ ԱՄՆ-Իսրայել ռազմավարական գործընկերության համատեղ հռչակագիր»:
«Միացյալ Նահանգները հաստատում է այլ գործընկերների հետ համատեղ աշխատելու հանձնառությունը՝ դիմակայելու Իրանի ագրեսիային և ապակայունացնող գործողություններին՝ լինեն դրանք թե՛ ուղղակի, թե՛ վստահված անձանց և ահաբեկչական կազմակերպությունների միջոցով, ինչպիսիք են «Հեզբոլլահը», «Համասը» և «Պաղեստինի Իսլամական Ջիհադը», – ասվում է հռչակագրում:
Անդրադառնալով պաղեստինյան խնդիրն՝ նշվում է, որ ԱՄՆ-ը աջակցում է երկու պետություն սկզբունքին՝ իսրայելցիների և պաղեստինցիների համար ապահովելու անվտանգության, ազատության և բարգավաճման հավասար պայմաններ:
Նշենք, որ ուրբաթ նախատեսվում է Բայդենի հանդիպումը Պաղեստինյան ինքնավարության առաջնորդ Մահմուդ Աբբասի հետ:
Հետևեք մեզ տելեգրամում
