Իրանի արտաքին հարաբերությունների ռազմավարական խորհրդի նախագահ Քյամալ Խարազին քննադատել է մի շարք երկրներում Իսրայելի գործողությունները՝ հավելելով, որ առաջին հերթին վտանգվում են այդ երկրների շահերը: Այս մասին իրանցի պաշտոնյան հայտարարել է Aljazeera-ի հետ զրույցում:
Պատասխանելով Իրանի շուրջ՝ ԱՄԷ-ում, Բահրեյնում, Թուրքիայում, Ադրբեջանում, Իրաքյան Քուրդիստանում Իսրայելի ներկայության վերաբերյալ հարցին նշել է.
«Իրանի շուրջ Իսրայելի ներկայությունը համեմատելի չէ Իսրայելի սահմաններին դիմադրության ուժերի ներկայության հետ: Քանի որ նախ այդ երկրների շահերն են վտանգվելու, և նրանք դա գիտեն: Եվ երկրորդ՝ Իրանի պատասխանը հուժկու է լինելու. թե՛ այդ երկրներում, թե՛ Իսրայելում»,- նշել է Խարազին:
Նա հիշեցրել է, որ Էրբիլ քաղաքում իրանական կողմը թիրախավորել է Իսրայելի շահերը, քանի որ այդ շրջաններն, ըստ նրա, Իրանի դեմ էին գործում:
«Այդ դեպքը կարող է կրկնվել բոլոր երկրներում, և այդ պարագայում այդ երկրները զգալի վնասներ են կրելու: Այս երկրներն իրենց շահերին են հետամուտ»,- հավելել է Խարազին:
Հետևեք մեզ տելեգրամում
