Ադրբեջանը դարձյալ խախտել է հրադադարի պահպանման ռեժիմը՝ կրակ բացելով հայ-ադրբեջանական սահմանի արևելյան հատվածում տեղակայված հայկական մարտական դիրքերի, Կարմիր շուկայի ուղղությամբ։ Կարմիր շուկայում հակառակորդի կողմից արձակած կրակոցների հետևանքով վնասվել է բնակչի առանձնատունը:
ԱՄՆ-ն վերահաստատել է ԵԱՀԿ Մինսկի խմբում ՌԴ-ի հետ աշխատանքը շարունակելու պատրաստակամությունը՝ հանուն ղարաբաղյան խնդրի համապարփակ ու խաղաղ կարգավորման։ Այդ մասին հայտարարել է Հայաստանում ԱՄՆ դեսպան Լին Թրեյսին։
Հայաստան-Թուրքիա հարաբերությունների կարգավորման գործընթացում Թուրքիայի հատուկ ներկայացուցիչ Սերդար Քըլըչն իր աշխատանքային թիմով հուլիսի 24-ին այցելել է Կարս:
Իսկ Թուրքիայի նախագահ Ռեջեփ Թայիփ Էրդողանը մանրամասներ է հայտնել ՀՀ վարչապետ Նիկոլ Փաշինյանի հետ ունեցած հեռախոսազրույցի մասին:
Իրաքում հրթիռակոծվել են թուրքական ռազմաբազաները: Բացի այդ՝ թիրախավորվել է նաև Մոսուլում Թուրքիայի հյուպատոսարանը: Իսկ իրաքյան շիայական «Սարայա Աբաբիլ» ռազմական կազմավորումը ստանձնել է թուրքական ռազմաբազաների նկատմամբ իրականացված հարձակման պատասխանատվությունը:
Իրաքի ԶՈՒ ԳՇ պետն էլ մանրամասնել է, որ երկրում թուրքական 5 ռազմաբազա կա՝ ավելի քան 4000 մարտիկներով:
Թվիթերյան վիճաբանություն է բռնկվել Ադրբեջանում Իսրայելի և Իրանի դեսպանների միջև: Պատճառը Թավրիզ քաղաքը ադրբեջանական մշակութային քաղաք ներկայացնելու Իսրայելի դեսպանի սադրիչ գրառումն էր:
Իսկ Սաուդյան Արաբիայի բարձրաստիճան պաշտոնյան հայտարարել է, որ թագավորության օդային տարածքի բացումը իսրայելական ավիափոխադրողների համար երկկողմ հարաբերությունների կարգավորմանն ուղղված քայլ չէ: Մինչդեռ իսրայելական ԶԼՄ-ներում տարածվում էր այն տեղեկությունը, թե այդ որոշումը հարաբերությունների կարգավորման սկիզբն է:
Մեծի Տանն Կիլիկիո կաթողիկոս Արամ Առաջինն ընդունել է Լիբանանում Պակիստանի դեսպան Սալման Աթարին։ Վերջինս կաթողիկոսին հրավիրել է այցելել Պակիստան:
Իսկ Իսրայելի պաշտպանության նախարար Բենի Գանցը հայտարարել էր, որ Իսրայելը պատրաստ է Իրանին հարված հասցնել:
Հետևեք մեզ տելեգրամում
