Հարավային Կովկասի հարցերով ադրբեջանցի փորձագետ Շուջաաթ Ահմեդզադե Twitter-ի իր միկրոբլոգում գրել է, թե Ադրբեջանի և Իրանի միջև «սառը պատերազմն» ուժգնանում է:
Նա մասնավորապես գրել է, որ Ադրբեջանի իշխանությունների կողմից վերահսկվող Az TV հեռուստաալիքը մեղադրել է Իրանին Մերձավոր Արևելքում «ահաբեկիչներին» ֆինանսավորելու և աջակցելու մեջ:
Նշենք, որ վերջին շրջանում Ադրբեջանի և Իրանի միջև հարաբերությունները լարված են: Չնայած պաշտոնական հրապարակումներին՝ ԶԼՄ-ներում տարածվում են տարբեր տեղեկություններ, համաձայն որոնց երկկողմ հարաբերություններն այդքան էլ ջերմ չեն:
Ավելի վաղ տեղեկացրել էինք, որ լիբանանյան լրատվամիջոցն ուշագրավ մանրամասներ էր ներկայացրել Ռայիսի-Ալիև վերջին հանդիպման վերաբերյալ: Աղբյուրը տեղեկացրել էր, որ նախագահներն անգամ վեճի են բռնկվել՝ միմյանց հասցեին մեղադրանքներ հնչեցնելով: Նշենք, որ Իրանը պարբերաբար հայտարարում է, որ տարածաշրջանում սահմանների փոփոխություն չի հանդուրժելու: Այս համատեքստում ուշագրավ էր նաև վերջերս Կապան քաղաքում Իրանի գլխավոր հյուապատոսության բացումը: Զուգահեռաբար իրանական ԶԼՄ-ներում էլ տեղեկություններ էին տարածվել, թե Նախիջևանի Ինքնավար Հանրապետությունում որոշակի շարժումներ են նկատվում և այն ցանկանում է միանալ Իրանին:
Հետևեք մեզ տելեգրամում
