Տարածաշրջանում ադրբեջանաթուրքական հավակնությունները զսպելու Իրանի կարևոր գործողություններից մեկը Բաքվի ռեսուրսների մասնատումն է։ Այս մասին «Facebook»-ի իր էջում գրել է տարածաշրջանային հարցերով փորձագետ Արմեն Պետրոսյանը:
Պետրոսյանը նշել է, որ Իրանի քաղաքականության առանցքում սեփական շահերի և անվտանգության ապահովումն է, որն այս պարագայում ուղիղ կերպով համընկնում է Հայաստանի շահերին։
Փորձագետի խոսքով՝ Հայաստանը պետք է զգուշավոր կեցվածքով և դիրքավորմամբ նպաստի Բաքու-Թեհրան լարվածության աճին։
«Նշվածը հնարավոր է հետևյալ երեք հարթություններում.
1. Նախաձեռնողականություն դրսևորելով՝ առավելագույնս ակտիվացնել Հայաստան-Իրան համագործակցությունը բոլոր մակարդակներում։
2. Ակտիվացնել Իրանի և Հայաստանի մասնակցությամբ բոլոր բազմակողմանի հնարավոր ձևաչափերը՝ այլ շահագրգիռ դերակատարների ներգրավելով (Հյուսիս-Հարավ, Պարսից Ծոց-Սև ծով, Հնդկաստան-Իրան-Հայաստան, Թուրքմենստան-Իրան-Հայաստան, Ռուսաստան-Իրան-Հայաստան…)։
3. Քարոզչական հարթությունում տեղեկատվական և փորձագիտական մակարդակներում չեզոք կերպով, բայց զանգվածաբար անդրադառնալ «Ադրբեջան-Իրան» լարվածության թեմային՝ դրա տարածումն ապահովելով նաև միջազգային լսարաններում»,- գրել է Պետրոսյանը:
Հետևեք մեզ տելեգրամում
