Այսօր մեկնարկել է սիրիական ճգնաժամի հարցով զբաղվող Աստանայի ձևաչափով 19-րդ հանդիպումը: Հանդիպումը մեկնարկել է Ղազախստանի մայրաքաղաք Աստանայում և տևելու է 2 օր:
Ինչպես հաղորդում է SANA գործակալությունը, սիրիական պատվիրակությունը արտգործնախարարի տեղակալ Այման Սուսանի գլխավորությամբ երեկ ժամանել է Աստանա՝ մասնակցելու հանդիպմանը:
Հանդիպմանը ներկա են գտնվելու նաև երաշխավոր երկրների՝ Ռուսաստանի, Իրանի և Թուրքիայի ներկայացուցիչները:
Նախատեսվում է, որ հանդիպման առաջին օրը մասնակից պատվիրակությունների միջև տեղի կունենան երկկողմ և եռակողմ խորհրդակցություններ և քննարկումներ օրակարգային հարցերի շուրջ: Քննարկումները կշարունակվեն հաջորդ օրը՝ լիագումար նիստի ավարտին վերջնական հայտարարությունը հրապարակելու համար: Այնուհետև տեղի կունենան մամուլի ասուլիսներ մասնակից պատվիրակությունների որոշ ներկայացուցիչների համար։
Հատկանշական է, որ 2017 թվականի սկզբից ի վեր Աստանայի ձևաչափով անցկացվել է ընդհանուր առմամբ 19 հանդիպում, որոնցից երկուսը կայացել են Ռուսաստանի Սոչի քաղաքում:
Հետևեք մեզ տելեգրամում
