Մարդու իրավունքների սիրիական դիտարանը հաղորդել է, որ թուրքական ուժերը ինտենսիվ հրետանային կրակ են բացել Աֆրինի արվարձանի ուղղությամբ:
Դիտարանի տեղեկություններով՝ մարդկային կորուստների մասին դեռևս ոչինչ չի հաղորդվել:
Հարկ է նշել, որ հրետակոծությունը տեղի է ունեցել այն բանից հետո, երբ Սիրիայի հյուսիս-արևելքում ԱՄՆ հատուկ ներկայացուցիչ Նիկոլաս Գրեյնջերը վերահաստատել է, որ Միացյալ Նահանգները կտրականապես դեմ է ռազմական որևէ գործողության ՝ այդ թվում ցամաքային ներխուժման:
Նա հավելել է, որ Թուրքիայի ձեռնարկած ռազմական ցանկացած գործողություն ապակայունացնելու է տարածաշրջանը և բացասաբար է անդրադառնալու ԻՊ-ի դեմ պայքարին։
Նշենք, որ տևական ժամանակ է՝ Թուրքիան սպառնում է Սիրիայի հյուսիսում ռազմական գործողություն սկսել: Տարածաշրջանային դերակատարները՝ Ռուսաստանը, ԱՄՆ-ը և Ֆրանսիան դեմ են որևէ գորոծղության: Իսկ օրեր առաջ Aljazeera-ն, հղում կատարելով թուրքական աղբյուրի, հայտնել է, որ պաշտոնական Անկարան Մոսկվայի և Վաշինգտոնի համար վերջնաժամկետ և պայմաններ է սահմանել՝ ռազմական գործողություն չսկսելու համար:
Ըստ թուրքական աղբյուրի՝ Անկարան ժամկետ է տվել ամերիկյան և ռուսական կողմերին Սիրիայի հյուսիսում՝ Մանբիջից, Թալ Ռիֆաթից և Այն Ալ-Արաբից «Սիրիայի դեմոկրատական ուժերին» (SDF) դուրս հանելու համար։ Նշվել է նաև, որ ժամկետը չի երկարաձգվելու, իսկ այլընտրանքը լինելու է քրդական ուժերի դեմ ռազմական գործողությունը։
Հավելենք, որ Թուրքիայում է Սիրիայում ռուսական ուժերի հրամանատար Ալեքսանդր Չայկոն:
Հետևեք մեզ տելեգրամում
