ԱՄՆ-ն դարձյալ նախազգուշացնում է Թուրքիային. «Ռազմական գործողությունները կվտանգեն ամերիկյան զինանձնակազմի անվտանգությունը»

ԱՄՆ պետքարտուղարության խոսնակ Նեդ Փրայսը անդրադարձել է Սիրիայի հյուսիսում Թուրքիայի հնարավոր ցամաքային գործողությունը։

«Այս մասին մենք շատ ենք խոսել վերջին երկու շաբաթվա ընթացքում, և մեր տեսակետն այս հարցում չի փոխվել։ Մենք ինչպես հանդիպումների ժամանակ, այնպես էլ հրապարակային հայտարարություններում նշել ենք, որ կտրականապես դեմ ենք ռազմական գործողություններին՝ ներառյալ ցամաքային ներխուժմանը, որն ավելի կսրի իրավիճակը Սիրիայի հյուսիսում և կվտանգի ԻՊ-դեմ պայքարը:

Մենք կարծում ենք, որ բոլոր կողմերը պետք է անհապաղ նվազեցնեն լարվածությունը։ Մենք չենք ցանկանում էսկալացիա ո՛չ սահմանի երկայնքով, ո՛չ Սիրիայի ներսում, ո՛չ էլ Սիրիայի հյուսիս-արևելքում: Այն վտանգի տակ կդնի ոչ միայն կոալիցիայի ձեռքբերումները ԻՊ-ի դեմ պայքարում, այլև ամերիկյան զինանձնակազմի անվտանգությունը»,- ասել է Փրայսը։

Հիշեցնենք, որ նոյեմբերի 13-ին Ստամբուլում տեղի ունեցած ուժգին պայթյունից հետո թուրքական իշխանությունները հայտարարել էին, որ միջադեպի հետևում կանգնած են Քրդստանի աշխատավորական կուսակցությունը (PKK-PKK) և սիրիական քրդական կազմավորումները, որոնց Անկարան ահաբեկչական է համարում։

Այս համատեքստում թուրքական իշխանությունները որոշել են Մագիլ-թուր» կոչվող ռազմական գործողություն սկսել Հյուսիսային Իրաքում և Սիրիայում քուրդ զինյալների դեմ, որոնց Անկարան ահաբեկիչներ է համարում։

Ավելի վաղ ԱՄՆ այլ պաշտոնյաներ նույնպես խիստ նախազգուշացում էին արել Թուրքիային՝ Սիրիայում նրանց ծրագրերի հետ կապված։