Սիրիայի նախագահ Բաշար Ալ-Ասադը հայտարարել է, որ երկրաշարժից հետո ավերածությունների մասշտաբները ավելի շատ ռեսուրսներ են պահանջում, քան հասանելի են պետությանը:
«Աղետի մասշտաբները և բոլորիս վստահված պարտականությունները շատ ավելին են, քան առկա հնարավորությունները», – հայտարարել է Ասադը աղետալի երկրաշարժից հետո իր առաջին հեռուստաուղերձում:
«Դա ոչ միայն պատերազմի ու պատժամիջոցների պատճառով էր, այլ նաև այն պատճառով, որ Սիրիան շուրջ երկուսուկես դար երկրաշարժի գոտի չի եղել։ Ո՛չ շենքերը, ո՛չ կառույցները, ո՛չ տեխնիկան պատրաստված չէին տարբեր տեսակի տարերային աղետների համար։ Սա իր տեսակի մեջ առաջին և ամենամեծ մարտահրավերը դարձավ»,- շարունակել է նախագահը:
Ալ-Ասադը նշել է, որ փրկարարական աշխատանքները ավարտելուց հետո համապատասխան մարմիններն արդեն մեկնարկել են ժամանակավոր կացարանների տրամադրման գործընթացը՝ մինչև հետագայում մշտական բնակարաններ կտրամադրվեն քաղաքացիներին:
Նա նաև շնորհակալություն է հայտնել «արաբ եղբայրներին և բարեկամներին», որոնք աջակցություն են ցուցաբերել Սիրիային:
Նշենք՝ Սիրիացի պաշտոնյաները հայտնել են, որ կառավարության վերահսկողության տակ գտնվող տարածքներում զոհերի թիվը գերազանցել է 1400-ը: Միևնույն ժամանակ, ավելի քան 4000 զոհ է գրանցվել ապստամբների վերահսկողության տակ գտնվող հյուսիսարևմտյան շրջաններում:
ՄԱԿ-ն իր հերթին նշել է, որ ընդհանուր առմամբ երկրաշարժից տուժել է 9 միլիոն սիրիացի: Ավելին՝ մոտ 5,3 միլիոն մարդ կարող է անօթևան մնալ երկրաշարժի պատճառով:
Հետևեք մեզ տելեգրամում
