Թուրքիայում տեղի ունեցած երկրաշարժը և Հայաստանի կողմից մարդասիրական աջակցության ցուցաբերումը որոշակիորեն կաշկանդում են Անկարային բացահայտ կերպով աջակցելու Ադրբեջանի հակահայ քաղաքականությանը։ Նման տեսակետ է հայտնել տարածաշրջանային հարցերով փորձագետ Արմեն Պետրոսյանը:
Փորձագետի խոսքով՝ մի շարք իրողություններ կարճաժամկետ հեռանկարում կանխատեսելի են դարձնում տարածաշրջանային անվտանգային միջավայրը:
Այս համատեսքտում Պետրոսյանը շեշտել է Մյունխենում ԱՄՆ-ի միջնորդությամբ կայացած Ադրբեջան-Հայաստան բարձր մակարդակի բանակցությունները։ Ըստ նրա՝ փաստացի տևական փակուղուց դուրս է գալիս և վերագործարկվում է Բաքու-Երևան հարաբերությունների կարգավորման բանակցային գործընթացը։
Փորձագետը տարածաշրջանային անվտանգային միջավայրը կանխատեսելի դարձնող գործոն է համարել նաև Հայաստանում ԵՄ քաղաքացիական դիտորդական առաքելության գործարկումը: Ըստ Պետրոսյանի՝ այս առումով որոշակիորեն սահմանափակում է Ադրբեջանի ագրեսիվ վարքագծի դրսևորումները։
Պետրոսյանն անդրադարձել է նաև Ռուսաստանի զրոյական ներգրավվածությանը, որը հանգեցնելու է Մոսկվայի հակազդեցության վարքագծին: Նրա խոսքով՝ Երևանի դիվանագիտական ջանքերի մի զգալի հատված պետք է ուղղված լինի ռուսական անկանխատեսելի մարտահրավերները մեղմելուն։
Հետևեք մեզ տելեգրամում
