Իրանը զարգացնում է իր արտաքին քաղաքականությունը՝ մշակելով նոր բազմավեկտոր համագործակցության ծրագրեր տարածաշրջանի խոշոր խաղացողների հետ:
Region Monitor-ի հետ զրույցում իրանագետ Էդվարդ Բերուջանյանը հիշեցրել է, որ Իրանի նախագահի՝ Չինաստան կատարած վերջին այցի ընթացքում կողմերի միջև համագործակցության 20 փաստաթուղթ է ստորագրվել։
Փորձագետը հիշեցրել է, որ տասնյակ տարիներ գտնվելով արևմտյան երկրների տնտեսական ծանր պատժամիջոցների տակ՝ Իսլամական Հանրապետությունը ստիպված էր հարմարվել նոր իրողությունների հետ և մշակել զարգացման նոր ճանապարհ։
«Այսուհանդերձ, Իրանը կարողացավ ստեղծել ինքնաբավ տնտեսություն, զարկ տալ ազգային արդյունաբերությանը, ինչպես նաև զարգացնել կրթության, գիտության և պաշտպանության ոլորտները: Այժմ Թեհրանն ընդլայնում է իր արտաքին քաղաքականությունը և տնտեսական հարաբերությունները ձևավորվող բազմաբևեռ աշխարհակարգի առանցքային երկրների հետ, առաջին հերթին՝ Չինաստանի, Հնդկաստանի և Ռուսաստանի հետ, ինչպես նաև կարևորում է փոքր, այդ թվում՝ հարևան երկների շահերը»,-հավելել է իրանագետը։
Անդրադառնալով Չինաստանի հետ Իրանի համագործակցությանը՝ Բերուջանյանը նշել է, որ Պեկինը իրանական նավթի խոշորագույն գնորդներից և Իրանում ներդրումներ իրականացնող հիմնական գործընկերներից է։
«Երկկողմը տնտեսական հարաբերությունների ընդլայնման հարցում երկու երկրների շահագրգռվածությունը փաստում է 2021թ․ Իրանի և Չինաստանի միջև 25-ամյա համապարփակ համագործակցության համաձայնագրի ստորագրումը»,- շեշտել է իրանագետը:
Նրա խոսքով՝ Չինաստանը նույնպես երկկողմ մակարդակով ակտիվորեն զարգացնում է քաղաքական և տնտեսական համագործակցությունը Թեհրանի հետ։
Փորձագետի համոզմամբ՝ փետրվարի 14-ից 16-ն Իրանի նախագահ Էբրահիմ Ռայիսիի պաշտոնական այցը Չինաստան վկայում է իրանա-չինական ռազմավարական գործընկերության նոր փուլի մասին, որի վառ ապացույցն է կողմերի միջև տեղեկատվական տեխնոլոգիաների, առողջապահության, գյուղատնտեսության, առևտրի, զբոսաշրջության, սպորտի և այլ ոլորտներում համագործակցության 20 փաստաթղթի ստորագրումը։
Փորձագետի խոսքով՝ երկու երկրների ղեկավարները համաձայնել են, որ պետք է աջակցեն միմյանց իրենց հիմնական շահերին վերաբերող հարցերում, ամրապնդեն հաղորդակցությունը միջազգային և տարածաշրջանային հարցերի շուրջ։
«Էբրահիմ Ռայիսիի այցը Չինաստան կարելի է դրական գնահատել, քանի որ կողմերի միջև ձեռք բերված պայմանավորվածությունից բացի, Սի Ցզինպինը պատրաստակամություն է հայտնել, որ Չինաստանը կշարունակի նպաստել Իրանի հետ «Գոտի և ճանապարհ» ծրագրի համատեղ կառուցմանը և պատրաստ է մեծացնել իրանական բարձրորակ գյուղատնտեսական արտադրանքի ներմուծումը»,-նկատել է փորձագետը։
Բերուջանյանի խոսքով՝ Իրանը ցանկացնում է վերականգնել պատմական միջազգային երթուղիները, որոնցից տարանցիկ առանցքային ուղիներից մեկը Չինաստանից և Հնդկաստանից անցնում էր Պարսկաստանով։
«Նման արտաքին քաղաքականության զարգացումը վկայում է, որ Իրանը ոչ միայն անցյալի ավանդույթներ ունեցող երկիր է, այլ նաև ժամանակակից Մերձավոր Արևելքի առանցքային խաղացող, ինչպես նաև ձգտում է դիրքավորվել՝ որպես ապագա բազմաբևեռ աշխարհի հեռանկարային բևեռ»,-եզրափակել է իրանագետը։
Հետևեք մեզ տելեգրամում
