Վրաստանի իշխող «Վրացական երազանքը», «Ժողովրդի ուժը» շարժումը և խորհրդարանական մեծամասնությունը համատեղ հայտարարել են «Օտարերկրյա ազդեցության թափանցիկության մասին» օրինագծի հետկանչման մասին:
Հայտարարության մեջ նշվել է, որ օրինագիծը բացասական լույսի ներքո է ներկայացվել՝ տարաձայնություններ առաջացնելով հասարակության մեջ:
«Մենք պետք է առավելագույնս զգույշ լինենք մեր երկրում խաղաղության, կայունության և տնտեսական զարգացման, ինչպես նաև եվրաինտեգրման ճանապարհին Վրաստանի առաջընթացի նկատմամբ։ Ուստի մեր յուրաքանչյուր համաքաղաքացու ուժը անհրաժեշտ է օգտագործել ոչ թե առճակատման, այլ երկրի ճիշտ ուղղությամբ զարգացման համար»,- ասված է հայտարարության մեջ:
Նշենք, որ երկու օր շարունակ Վրաստանի մայրաքաղաքում լայնամասշտաբ ցույցեր էին տեղի ունենում, որոնք ուղեկցվում էին անկարգություններով և իրավապահների հետ բախումներով:
Բողոքի ակցիայի մասնակիցները դեմ էին առաջին ընթերցմամբ ընդունված «Օտարերկրյա ազդեցության թափանցիկության մասին» օրենքի նախագծին, համաձայն որի՝ օտարերկրյա ազդեցության գործակալներ են համարվում իրավաբանական այն անձինք, որոնց տարեկան եկամուտների 20 %-ից ավելին ստացվում է արտասահմանից:
Իշխող կուսակցությունը և օրինագծի հեղինակները պնդում էին, որ նախագծի միակ նպատակը ԶԼՄ-ների և հասարակական կազմակերպությունների ֆինանսավորման թափանցիկության ապահովումն է, մինչդեռ նախագծի ընդդիմախոսները միաձայն հայտարարում էին, որ օրինագծերն ուղղակիորեն շեղվում են արևմտամետ կուրսից և ծառայում մեկ նպատակի՝ թույլ չտալ Վրաստանին ստանալ ԵՄ անդամակցության թեկնածուի կարգավիճակ, ինչը Վրաստանի Սահմանադրության խախտում է։
Հետևեք մեզ տելեգրամում
