Վրաստանի խորհրդարանի մարտի 7-ի լիագումար նիստում առաջին ընթերցմամբ ընդունված աղմկահարույց օրինագիծը ուղեկցվեց մի շարք բողոքի ցույցերով և հանրահավաքով, որը դարձավ Վրաստանում վերջին տարիների ամենազանգվածայիններից մեկը՝ նույնիսկ գերազանցելով 2019թ. հակառուսական ցույցերը և անցյալ տարվա Ուկրաինայի համար համերաշխության և ընդդեմ իշխանությունների՝ Ռուսաստանի դեմ պատժամիջոցներից հրաժարվելու քաղաքականության դեմ անցկացված ցույցերը,- այս մասին ասել է տարածաշրջանային հարցերով փորձագետ Էդվարդ Բերուջանյանը՝ Region Monitor-ի հետ զրույցում։
Փորձագետը նշել է, որ Վրաստանի իշխող «Վրացական երազանք» կուսակցության շարքերը լքած և «Ժողովրդի ուժը» հասարակական շարժում ձևավորած պատգամավորները խորհրդարանին «Օտարերկրյա ազդեցության թափանցիկության մասին» օրինագիծ էին ներկայացրել, որը տարբեր ուժերի կողմից քննադատության առարկա էր դարձել՝ պատճառաբանելով, որ օրնագիծը նման է ռուսականին և ուղղված է արևմտյան հիմնադրամներից դրամաշնորհներ ստացող հասարակական կազմակերպությունների դեմ։
««Ժողովրդի ուժը» շարժման մշակած օրենսդրական փոփոխությունները տարբեր գնահատականներ էին ստացել խորհրդարանական մեծամասնության և ընդդիմադիր պատգամավորների կողմից։ «Վրացական երազանքի» պատգամավորները հավանություն էին տվել նախաձեռնությանը, իսկ ընդդիմադիր դաշտում, ընդհակառակը, քննադատել էին նախատեսվող փոփոխությունները»,-հավելել է Բերուջանյանը։
Անդրադառնալով վիճահարույց օրինագծի նկատմամբ արտաքին արձագանքներին՝ Բերուջանյանը ասել է, որ օրինագիծը խիստ քննադատության արժանացավ նաև արևմտյան որոշ բարձրաստիճան պաշտոնյաների և կազմակերպությունների կողմից, ինչպես նաև կտրուկ հայտարարություններով հանդես եկան Վրաստանում առաքելություն իրականացնող արևմտյան գործիչները՝ մտահոգություն հայտնելով, որ Վրաստանի առաջարկած օտարերկրյա գործակալների օրինագծերը լուրջ վտանգ են ներկայացնում Վրաստանի եվրատլանտյան ապագայի և վրացիների՝ սեփական տնտեսական, սոցիալական և այլ նկրտումներն իրականացնելու կարողության համար։
Փորձագետը հիշեցրեց, որ նախորդ տարի Թբիլիսին Եվրամիությանը անդամակցության հայտ էր ուղարկել, սակայն, ի տարբերություն Ուկրաինայի և Մոլդովայի, երկիրը թեկնածուի կարգավիճակ չի ստացել, այլ Եվրամիությունը Վրաստանին առաջարկել էր անդամակցելու հեռանկար՝ հանձնարարելով բարեփոխումներ իրականացնել 12 առաջնահերթ ոլորտներում։
Փորձագետի համոզմամբ՝ վերջին շրջանում ակնհայտ էր դարձել Վրաստանի իշխանությունների և արևմտյան գործընկերների միջև նկատվող հակասությունները, իսկ օրինագծի առաջարկը որոշակի առումով ավելի սրեց այն։
«Ստեղծված իրավիճակում Վրաստանի իշխող ուժը, հետ կանչելով օրինագիծը, փորձում է ցույց տալ, որ իրենք կառուցողական մոտեցում ունեն, լսում են քաղաքացիների և գործընկերների պահանջները և հավատարիմ են Վրաստանի որդեգրած արևմտյան ուղուն»,- շարունակում է Բերուջանյանը։
Մեկնաբանելով Վրաստանում իշխող «Վրացական երազանքի», «Ժողովրդի ուժը» շարժման և խորհրդարանական մեծամասնության կողմից «օտարերկրյա գործակալների» մասին օրինագծերի հետկանչը՝ փորձագետը ընդգծում է, որ հետկանչը դրական արձագանք է գտել Վրաստանի միջազգային գործընկերների շրջանում, և նրանք ողջունել են Վրաստանի իշխող ուժի այս քայլը։
«Ըստ էության, այս օրինագծի ընդունումով՝ Վրաստանի իշխանությունները ցանկանում էին առավելապես վերահսկել արտաքին ուժերի ազդեցության մակարդակը երկրի ներհասարակական և ներքաղաքական զարգացումներում։ Իշխող «Վրացական երազանք»-ը ցանկանում է հավասարակշռման քաղաքականություն վարել այլ ոչ թե նայել բացառապես դեպի Արևմուտք, ինչը տեղի էր ունենում նախորդ իշխանությունների ժամանակ»,- նկատել է փորձագետը։
«Վիճահարույց օրինագծի հետկանչը կարելի է բացատրել նրանով, որ իշխող ուժը չէր սպասում նման հասարակական արձագանքի, դա կարելի է տեսնել համատեղ հայտարարության տեքստից, որտեղ նշվել էր, որ ստի մեքենան կարողացել է օրինագիծը ներկայացնել բացասական լույսի ներքո և մոլորության մեջ գցել հանրության որոշակի հատվածին՝ փակցնելով «Ռուսական օրենք» կեղծ պիտակը, որը հանրության մի մասի աչքում ներկայացվել է որպես շեղում եվրոպական կուրսից։ Հնարավոր է նաև, որ վրացական իշխանությունները ինչ-որ համաձայնության են եկել արևմտյան գործընկերների հետ սակարկությունների կամ զիջումների միջոցով»,- եզրափակել է Բերուջանյանը։
Հետևեք մեզ տելեգրամում
