Թուրքիայի հայկական միակ գյուղի՝ Վաքըֆլըի բնակիչները շարունակում են անհանգստանալ գյուղի ճակատագրով:
Վաքըֆլըի գյուղապետ Պերճ Քարթունը թուրքական թերթերից մեկի հետ զրույցում նշել է, որ գյուղը ծայրից ծայր քանդվել է:
Գյուղապետը պատմել է, որ գյուղում 35 տուն կա՝ մոտ 130 հոգի բնակչությամբ: Երկրաշարժից անմիջապես հետո 30 կին և երեխա Կ. Պոլսի հայոց պատրիարք Ս. Մաշալյանի ուղարկած ավտոբուսով տեղափոխվել են Ստամբուլ: 20 մարդ էլ գնացել է բարեկամների մոտ՝ Իսկենդերուն:
«Այս գյուղի բնակչությունը գնալով նվազում է: Երկրաշարժը մեծ ավերածություն եղավ: Որպեսզի այս գյուղը չվերանա, պետության աջակցությունն է անհրաժեշտ»,-նշել է Պերճ Քարթունը:
Նա ասել է, որ գյուղում 15 տուն ծանր վնաս է կրել, վնասվել է նաև եկեղեցին: Այս պահին մոտ 25 վրան ունեն, որտեղ էլ ապրում են: Շեշտել է, որ բոլոր կողմերից օգնություն է գալիս, 4-րդ օրվանից սկսել է տեղ հասնել օգնությունը, շնորհակալություն է հայտնել բարերարներին, պաշտոնյաներին:
«Սրանից հետոն արդեն պետությունից ենք ակնկալում: Ինչպե՞ս են կառուցվելու քանդված տները: Գումարային օգնությա՞մբ, թե՞ այլ ճանապարհներով: Պետք է ստեղծենք այն հնարավորությունները, որոնք կկանխարգելեն, որ մարդիկ լքեն այս գյուղը»,-նշել է գյուղապետը:
Հետևեք մեզ տելեգրամում
