Սիրիայի նախագահ Բաշար Ալ-Ասադը հայտարարել է, որ կողջունի Ռուսաստանի ցանկացած առաջարկ՝ Սիրիայում նոր ռազմաբազաներ ստեղծելու և ռուսական զորքերի թվաքանակն ավելացնելու առնչությամբ:
«Մենք կարծում ենք, որ Սիրիայում ռուսական ներկայության ընդլայնումը լավ բան է», – ասել է Ասադը RIA-ի հետ զրույցում։
Ասադը հավելել է, որ ռուսական ռազմական ներկայության ավելացումն ընդամենը նյութատեխնիկական խնդիր է: Նրա խոսքով՝ նման ներկայությունը նաև չպետք է կրի ժամանակավոր բնույթ, այլ լինի մշտական:
Նշենք, որ Ռուսաստանը միջամտել է սիրիական պատերազմին 2015 թվականին՝ պաշտոնական Դամասկոսի խնդրանքով: Ռուսական զորքերի աջակցությամբ՝ Սիրիան կարողացավ ընդդիմության գրաված տարածքները վերադարձնել:
Ներկայումս Ռուսաստանը Սիրիայում ունի երկու ռազմաբազա՝ Հմեյմիմի ավիաբազան և Տարտուսի ծովային ռազմաբազան:
Հետևեք մեզ տելեգրամում
