Երեկ՝ մարտի 20-ին Իսրայելի Հայֆա քաղաքում հանդիսավորությամբ տեղի ունեցավ Հայոց Ցեղասպանության շրջանակի և ցուցանակի բացման արարողությունը։
Ինչպես գրում է «Իսրայելահայեր» կայքը, բացմանը ներկա էին Հայֆայի քաղաքապետ Էյնատ Կալիշ֊Ռոտեմ, Իսրայելում ՀՀ արտակարգ և լիազոր դեսպան Արման Հակոբյանն, Երուսաղեմի Հայոց Պատրիարքարանի պատվիրակությունը Հայր Կորյուն վարդապետ Բաղդասարյանի ու Հայր Աղան Գոչյանի մասնակցությամբ, Հայֆայի բոլոր կրոնական հարանվանությունների ներկայացուցիչներն ու Իսրայելի տարբեր շրջանների հայկական համայնքների ներկայացուցիչներ։
Ավելի քան 350 հյուրեր էին հավաքվել մասնակից դառնալու բացման արարողությանը, որն ավելի քան 2 ժամ տևեց։
Հայոց Ցեղասպանության շրջանակի և ցուցանակի բացման արարողությանը ելույթ ունեցավ նաև Հայֆայի քաղաքապետ Էյնատ Կալիշ֊Ռոտեմին, ով կարևորեց այս իրադարձությունը: Նա նշեց, որ հայկական համայնքը քաղաքի անբաժանելի համայնքներից մեկն է և ակտիվորեն մասնակցում է քաղաքային կյանքին: Ռոտեմին հավելեց, որ մյուս ամիս էլ հրեական ողջակիզման հերթական տարելիցին է՝ շեշտելով, որ եթե ոչ հրեաներն, ապա ովքեր ավելի լավ կարող են հասկանալ հայ ժողովրդի ողբերգությունն ու իր համերշխությունը հայտնեց հայ ժողովրդին:
Եբրայերեն լեզվով ելույթ է ունեցել ՀՀ արտակարգ և լիազոր դեսպան Արման Հակոբյանը, ով պատմական գնահատեց քաղաքապետարանի այս որոշումը։ Դեսպանն ասաց, որ ոչ միայն հայֆայահայերի ու Իսրայելի հայկական համայնքի համար, այլև ողջ աշխարհի հայության համար չափազանց կարևոր է Իսրայելի իր մեծությամբ երրորդ քաղաքում Հայոց Ցեղասպանության անմեղ զոհերի հիշատակին նվիրված հուշարձան բացելն ու վստահությամբ կարելի է ասել, որ ճիշտ ճանապարհ է ուրվագծվում Իսրայելում Ցեղասպանության ճանաչման համար:
Նշենք, որ հունվարի 21-ին Հայֆայի քաղաքապետարանի ավագանին միաձայն որոշեր էր ճանաչել Հայոց Ցեղասպանությունը, Հայոց Ցեղասպանության հրապարակ ստեղծել Հայֆայի ամենաբանուկ Սդերոտ Բեն Գուրիոն փողոցի վրա, որը զբուսաշրջության ու հայֆացիների ամենասիրելի զբոսավայրերից մեկն է ու հարևանությամբ է գտնվում Բահայան այգիներին:
Հետևեք մեզ տելեգրամում
