Ադրբեջանի որոշ պաշտոնյաներ ցանկանում են փոխել տարածաշրջանի աշխարհագրությունը, իսկ Իրանը բազմիցս զգուշացրել է, որ տարածաշրջանի երկրների աշխարհագրական սահմանների փոփոխությունը չափազանց վտանագավոր է: Այս մասին, ինչպես փոխանցում է «qafqaz» լրատվամիջոցը, հայտարարել է Իրանի խորհդարանում ազգային անվտանգության ու արտաքին քաղաքականության հանձնաժողովի անդամ Ֆադա Հոսեյն Մալեքին:
Իրանցի պաշտոնյան շարունակել է՝ հավելելով, որ Ադրբեջանի նախագահը մտադիր է խաթարել տարածաշրջանի աշխարհագրական հավասարակշռությունը: Այս համատեքստում Մալեքին հիշեցրել է Ալիևի խոսքերը՝ թե Հայաստանն ուզի, թե՝ ոչ այսպես կոչված «Զանգեզուրի միջանցքը» բացվելու է:
Մալեքին անդրադարձել է նաև Արցախում ադրբեջանական կողմի վերջին սադրանքին՝ նշելով, որ Ադրբեջանի ռազմական տեղաշարժերի հետևում Միացյալ Նահանգներն ու «սիոնիստական ռեժիմն» են կանգնած:
Իրանցի պաշտոնյայի խոսքով՝ Բաքվի իշխանությունները պետք է զգույշ լինեն և թույլ չտան, որ օտար երկրները որևէ գործողություն ձեռնարկեն տարածաշրջանում և խաթարեն տարածաշրջանի կարգը։
Մալեքին կոչ է արել Ադրբեջանին հավատարիմ մնալ 2020թ. հրադադարի եռակողմ համաձայնությանը և դրան հակասող գործողություններ չձեռնարկել:
Հետևեք մեզ տելեգրամում
