Երեք կուսակցություն բողոք է ներկայացրել Թուրքիայի ընտրական հանձնաժողով՝ գալիք նախագահական ընտրություններում Ռեջեփ Թայիփ Էրդողանի առաջադրման դեմ։ Նա արդեն երկու անգամ ընտրվել է և չի կարող կրկին առաջադրվել, կարծում է ընդդիմությունը։
Երեքշաբթի օրը՝ մարտի 28-ին, Թուրքիայի երեք ընդդիմադիր կուսակցությունների ներկայացուցիչներ դիմում են ներկայացրել Բարձրագույն ընտրական հանձնաժողով՝ պահանջելով գործող նախագահ Ռեջեփ Թայիփ Էրդողանին հանել մայիսին կայանալիք նախագահական ընտրությունների թեկնածուների ցուցակից։
Նրա առաջադրումը սահմանադրության խախտում է՝ ըստ «Լավ» կուսակցության, «Ժողովրդավարություն և բեկում» և «Հայրենիք» կուսակցությունների:
2014 և 2018 թվականներին նախագահական ընտրություններում հաղթած Էրդողանը երրորդ անգամ առաջադրվելու իրավունք կունենա միայն այն դեպքում, եթե Թուրքիայի խորհրդարանը արտահերթ ընտրություններ նշանակի, շեշտում են ընդդիմադիրները։ Սակայն մայիսի 14-ին կայանալիք քվեարկությունը նշանակված էր նախագահի հրամանագրով։
Իր հերթին իշխող «Արդարություն և զարգացում» կուսակցության խոսնակ Օմեր Չելիքը մարտի 28-ին հայտարարել է, որ ընտրություններին Էրդողանի մասնակցության համար որևէ խոչընդոտ չկա։ Նրա խոսքով՝ 2018 թվականին՝ սահմանադրության փոփոխությունից հետո, առաջին անգամ է կայանալու ընտրություն նախագահական համակարգով, հետևաբար նրա նախկին նախագահական ժամկետը հաշվի չի առնվում։ Սահմանադրական իրավունքի ոլորտի թուրք փորձագետները համաձայն չեն՝ արդյո՞ք օրենքի նորմերը թույլ են տալիս Էրդողանին կրկին առաջադրվել։
Սպասվում է, որ այս տարվա ընտրություններում Թուրքիայի նախագահի թեկնածուների վերջնական ցուցակը կհրապարակվի մարտի 31-ին։
Հետևեք մեզ տելեգրամում
