Ապրիլի 2-ը ևս մեկ խորհրդանշական օր դարձավ Պետախ Տիկվայի հայկական համայնքի նորագույն պատմության մեջ:
Ինչպես տեղեկացնում է «Իսրայելահայեր» թերթը, քաղաքի «Համայնքների» այգին վերանվանվել է աշխարհահռչակ հայ շանսոնյե Շառլ Ազնավուրի անվամբ:
Այգու վերանվանման բացման արարողությանը ներկա էին Պետախ Տիկվայի քաղաքապետ Ռամի Գրինբերգը, Իսրայելում ՀՀ արտակարգ ու լիազոր դեսպան Արման Հակոբյանը, հյուպատոս Նարեկ Ղազարյանը, Ֆրանսիայի դեսպանատան ներկայացուցիչները, Երուսաղեմի Հայոց պատրիարքարանի պատվիրակությունը՝ դիվանապետ հայր Աղան Գոչյանի գլխավորությամբ, Հայֆայի «ՀՄԷՄ» կազմակերպության ղեկավարությունը՝ Հայֆայի ու հյուսիսային քաղաքների հոգևոր հովիվ տեր Տիրայր քահանա Հովակիմյանի գլխավորությամբ և այլ բարձրաստիճան հյուրեր:
Նշենք, որ Իսրայելում գործող հայկական միություններն անցյալ տարի նամակով դիմել էին պարոն Գրինբերգին՝ խնդրելով «Համայնքների» այգին, որտեղ տեղադրված է Հայոց Ցեղասպանության անմեղ զոհերին նվիրված հուշարձանը, վերանվանել հայ ժողովրդի աշխարհահռչակ զավակ ու մարդասեր Շառլ Ազնավուրի անունով, որպես ոչ միայն աշխարհում հայտնի ֆրանսահայ երգիչ, այլև որպես հրեաներին Հոլոքոստի ժամանակ փրկած Ազնավուրյանների գերդաստանի արժանի զավակ ու որպես խորհրդանիշ հայ-հրեական բարեկամության:
Քաղաքային խորհուրդը քաղաքապետ Ռամի Գրինբերգի գլխավորությամբ միաձայն որոշում էր կայացրել վերանվանել «Համայնքների» այգին ֆրանսիահայ շանսոնյե Շառլ Ազնավուրի անունով:
«Իսրայելահայեր» թերթը տեղեկացնում է, որ Շառլ Ազնավուրի հայրն ու մայրը՝ Միշան ու Քնարը Երկրորդ Համաշխարհային պատերազմի տարիներին օգնել են տասնյակ հրեաների և թաքցրել Փարիզում իրենց տանը՝ այսպիսով փրկելով հրեաներին ողջակիզումից ու ցեղասպանությունից: Թերթի ուսումնասիրությունների արդյունքում նաև պարզվել է, որ Շառլ Ազնավուրի հորեղբայրը՝ Խաչատուր Ազնավուրյանը ևս Դոնեցկում իր տան նկուղում հրեաների էր թաքցնում:
Հետևեք մեզ տելեգրամում
