Իրանի և Սաուդյան Արաբիայի ԱԳ նախարարները համատեղ հայտարարություն են ստորագրել

Իրանի և Սաուդյան Արաբիայի արտգործնախարարները Պեկինում համատեղ հայտարարություն են ստորագրել։

Հայտարարութունն ընդգծել է 2001թ․ կողմերի միջև ստորագրված անվտանգային ոլորտում համագործակցության պայմանագրի և 1998թ․ տնտեսության, առևտրի, ներդրումների, գիտության, մշակույթի և այլ ոլորտներում համագործակցության վերաբերյալ պայմանագրի իրագործման կարևորությունը։

Կողմերը պայմանավորվել են

—համաձայնեցված ժամանակահատվածում վերաբացել դեսպանատներն ու հյուպատոսարանները,

—շարունակել անհրաժեշտ համակարգումները թռիչքների վերսկսման և փոխադարձ այցերի իրականցման համար,

—ավելացնել համագործակցության զարգացման ուղիների շուրջ խորհրդատվական հանդիպումներն ու քննարկումները՝ հաշվի առնելով երկու եղբայրական ժողովուրդների ընդհանուր շահերն իրացնելու բնական ռեսուրսներն ու տնտեսական հնարավորությունները,

—ընդլայնել բոլոր այն ոլորտներում համագործակցությունը, որոնք կարող են ապահովել ինչպես տարածաշրջանի կայունությունն ու անվտանգություն, այնպես էլ երկու երկրների շահերը,

—կողմերը պատրաստակամություն են հայտնել վերացնել երկկողմ համագործակցության զարգացմանը խանգարող բոլոր խոչընդոտները։

Al Arabiya-ն գրել է, որ Սաուդյան Արաբիայի արտգործնախարարն իրանցի պաշտոնակցին հրավիրել է Էր-Ռիադ: Աբդոլլահիանը ողջունել է այն և ինքն էլ սաուդցի գործընկերոջն է հրավիրել Թեհրան։