Իրանական «Շարղ» օրաթերթի թելեգրամյան ալիքում տեսահոլովակ է հրապարակվել, որտեղ անդրադարձ է կատարվել հարավկովկասյան հակամարտությունների ազդեցությանը «Հյուսիս-հարավ» միջանցքի գործարկման համատեքստում։ Տեսանյությում նախ ներկայացվել է Հյուսիս-հարավ միջանցքի հնարավոր ուղիները և միջանցքի նկատմամբ շահագրգռվածություն ցուցաբերած կողմերը։ Այնուհետ նշվել է, որ այս նախագծի համար դիտարկվում է 4 երթուղի, այդ թվում՝ Կենտրոնական Ասիայի երկաթուղին, Կասպից ծովի ուղին, Հայաստանի տարածքով ճանապարհը, Ադրբեջանի տարածքով երկաթուղին։ Շեշտվել է, որ Իրանը լավ հարաբերություններ ունի Կենտրոնական Ասիայի երկրների հետ, ինչպես նաև այս երկրներից շատերի հետ նաև անդամակցում է տարբեր միջազգային տնտեսական կազմակերպությունների։
Մատնանշելով Հայաստանի տարածքով անցնող ճանապարհը՝ ընդգծվել է, որ ՀՀ կառավարությունը շահագրգռված է, և այս ճանապարհը հովանավորվում է ԵՄ-ի, Հնդկաստանի և Չինաստանի կողմից։
Նշվել է, որ Իրանի, Հայաստանի և Վրաստանի միջև բարեկամական հարաբերությունները և ԵԱՏՄ-ին Հայաստանի անդամակցությունը հնարավորություն են տալիս այս ճանապարհի շահագործման համար։
Ադրբեջանի տարածքով անցնող ճանապարհի վերաբերյալ նշվել է, որ Իրանի և Ադրբեջանի միջև առկա լարվածությունը, Ռեշտ-Աստարա ծախսատար երկաթուղու կառուցումը, բնապահպանական զգալի վնասները, նախկինում Ադրբեջանով Իրան-Ռուսաստան բեռնափոխադրումների դժվարանցանելիությունն ու արհեստական խոչընդոտները և Իրանի դեմ «Սիոնիստական ռեժիմի» հետ Ադրբեջանի անվտանգության համագործակցությունը խնդիրներ են ստեղծում այս երթուղու շահագործման համար։
Շեշտվել է, որ Ադրբեջանը Արևմուտքի համար նաև աշխարհաքաղաքական լավ գործիք է ընդդեմ Իրանի և Ռուսաստանի, ինչպես նաև եթե Ադրբեջանին հաջողվի գործարկել «կեղծ Զանգեզուրի միջանցքը», ապա Իրանը կհայտնվի շրջափակման մեջ։
Հետևեք մեզ տելեգրամում
