Իսրայելի արտգործնախարար էլի Կոհենի այցն Ադրբեջան ընդգծում է Բաքվի և Երուսաղեմի միջև հարաբերությունները, որոնք տարիներ շարունակ ջերմ են: Նման տեսակետ է ներկայացվել The Jerusalem Post պարբերականում հրապարակված հոդվածի:
The Jerusalem Post-ը նշել է, որ Իսրայելն Ադրբեջանին դիտարկում է որպես ռազմավարական գործընկեր տարածաշրջանում: Բաքուն նաև որպես պատմական գործընկեր, Իսրայելի համար այլ երկրների՝ օրինակ Թուրքիայի հետ հարաբերությունների բարելավման նախաշավիղ է եղել:
Ըստ պարբերականի՝ Բաքվի հետ հարաբերությունների ամրապնդման առանցքում առևտրային կապերի ձևավորումն է: Ադրբեջանն արդեն կարևոր շուկա է դարձել Իսրայելի պաշտպանական արդյունաբերության համար: Արդեն ժամանակն է ամրապնդել երկկողմ հարաբերությունները նաև այլ ոլորտներում: Իսրայելը նորարար է բազմաթիվ ոլորտներում, այդ թվում՝ կիբերանվտանգության, սննդի տեխնոլոգիաների և ջրային ռեսուրսների կառավարմանն առնչվող հարցերում:
«Հատկանշական է, որ Բաքուն հյուրընկալում է Իսրայելի արտգործնախարարի այցը տարածաշրջանային փոփոխությունների ժամանակահատվածում: Վերջին տարվա ընթացքում աճել է Իրան-Ադրբեջան լարվածությունը, քանի որ Թեհրանը շարունակում է թշնամական հռետորաբանություն կիրառել Բաքվի նկատմամբ և քննադատել Իսրայել-Ադրբեջան հարաբերությունները»,- ընգծվել է հոդվածում:
Միևնույն ժամանակ, նշվել է, որ Ադրբեջանը լարվածության մեջ է Հայաստանի հետ: Ուշադրություն է հրավիրվել Ռուսաստանի գործոնի վրա, որը առանցքային դեր է խաղում Հարավային Կովկասում և շահագրգռված է այնտեղի զարգացումներով։ Ուստի Բաքվի հարաբերություններն Արևմուտքի և Իսրայելի հետ կարևոր են միջազգային ասպարեզում անկախ մանևրելու ունակության համար:
Հետևեք մեզ տելեգրամում
