Շուրջ երեսուն տարվա դադարից հետո Երևան-Կապան թռիչք է իրականացվել: Տեղեկությունը հայտնում է Քաղաքացիական ավիացիայի կոմիտեն։
«Այսօր՝ ապրիլի 26-ին, Կապանի «Սյունիք» օդանավակայանում 11:58-ին բարեհաջող վայրէջք է կատարել L-410–UVP E20 չեխական արտադրության մարդատար օդանավը, որը նախատեսված է 19 ուղևորի համար: Այն գրանցված է Հայաստանում: Թռիչքը կրում էր փորձնական բնույթ: Օդանավը «Զվարթնոց» միջազգային օդանավակայանից օդ է բարձրացել ժամը 10:10-ին»,- ասված է հաղորդագրությունում։
Նշվում է, որ Կապանի օդանավակայանը վերանորոգվել է միջազգային չափանիշների համաձայն և Քաղավիացիայի կոմիտեի կողմից սերտիֆիկացվել է 2020-ին:
«Այս թռիչքը հիրավի պատմական էր, քանի որ 90-ականներից Կապանի օդանավակայանում թռիչքներ չեն իրականացվել՝ բացառությամբ 2017 թվականին մեկ մասնավոր թռիչքի»,- տեղեկացնում են Կոմիտեից։
Հետևեք մեզ տելեգրամում
