Երեկ Մոսկվայում կայացել էր Ռուսաստանի, Իրանի, Սիրիայի և Թուրքիայի պաշտպանության նախարարների քառակողմ հանդիպումը: Արաբական ԶԼՄ-ները որոշ նոր մանրամասներ են հայտնել հանդիպման մասին:
Սաուդական «Asharq Al Awsat» թերթը, վկայակոչելով ռուսական աղբյուրներին, հայտնել է, որ դռնփակ հանդիպումների քննարկումների արդյունքում նախապատրաստվում է արտգործնախարարների քառակողմ հանդիպումն անցկացնել մայիսի 2-ին:
Իսկ սիրիական «Al-Watan» թերթը, հղում կատարելով անանուն աղբյուրին, հերքել է Թուրքիայի ՊՆ-ի այն հայտարարությունը, թե հանդիպման ընթացքում Թուրքիայի և Սիրիայի միջև հարաբերությունների կարգավորմանն ուղղված հստակ քայլեր են քննարկվել: «Al-Watan»-ի տեղեկություններով՝ հանդիպման ժամանակ քննարկվել է Սիրիայի տարածքից թուրքական զինված ուժերի դուրսբերումը, իսկ կարգավորման քայլերին անդրադարձ չի կատարվել:
Ուշագրավ է նաև, որ Asharq Al-Awsat-ի հետ զրույցում քառակողմ հանդիպման մասին տեղեկացված ռուս դիվանագետը հանդիպումը որակել է «շատ լուրջ և դրական»: Նա նշել է, որ բանակցությունները «կենտրոնացել են այն հարցերի վրա, որոնք պահանջում են ավելի շատ համակարգում՝ հատկապես անվտանգության և հակաահաբեկչությանն առնչվող ոլորտներում»:
Հետևեք մեզ տելեգրամում
