Սաուդյան Արաբիայի թագաժառանգ Մուհամմադ բին Սալմանը Ջիդդա քաղաքում ընդունել է Սպիտակ տան ազգային անվտանգության խորհրդական Ջեյք Սալիվանին:
Ինչպես գրում է Al Arabiya-ն, կողմերը քննարկել են Միացյալ Նահանգների և Սաուդյան Արաբիայի միջև ռազմավարական հարաբերությունները և տարբեր ոլորտներում դրանք ընդլայնելու ուղիները: Զրուցակիցներն անդրադարձել են նաև համատեղ հետաքրքրություն ներկայացնող տարածաշրջանային և միջազգային հիմնախնդիրներին:
Հանդիպմանը ներկա էին նաև ԱՄՆ մի քանի բարձրաստիճան պաշտոնյաներ՝ այդ թվում Սաուդյան Արաբիայում ԱՄՆ դեսպան Մայքլ Ռաթնին, Մերձավոր Արևելքի ազգային անվտանգության խորհրդի համակարգող Բրեթ Մաքգուրքը և էներգետիկ անվտանգության հարցերով ԱՄՆ ավագ խորհրդական Ամոս Հոխշտեյնը:
Al Arabiya-ն նաև տեղեկացնում է, որ հունիսին նախատեսվում է ԱՄՆ պետքարտուղար Էնթոնի Բլինքենի այցը Սաուդյան Արաբիա: Լրատվամիջոցի տեղեկացմամբ՝ Միացյալ Նահանգները քայլեր է ձեռնարկում թուլացնելու թագավորության հետ հարաբերություններում առկա լարվածությունը, որն ուժեղացել է էներգետիկ շահերի և նավթի արդյունահանման մակարդակը նվազեցնելու ՕՊԵԿ+-ի որոշման պատճառով:
Հետևեք մեզ տելեգրամում
