Իրանի ԱԳՆ խոսնակ Նասեր Քանանին հաստատել է Իրանի կողմից ադրբեջանցի 4 դիվանագետի անցանկալի անձ ճանաչելու մասին լուրերը:
«Իրանն Ադրբեջանի ոչ կառուցողական գործողությունների հետևանքով արտաքսել է ադրբեջանցի չորս դիվանագետ՝ 2 դիվանագետ Թեհրանում դեսպանատան անձնակազմից, երկուսը՝ Թավրիզում հյուպատոսարանից»,- մամուլի ասուլիսի ժամանակ հայտարարել է Քանանին:
Խոսնակն անդրադարձել է նաև Իրանի վերաբերյալ Ալիևի վերջին հայտարարություններին՝ հավելելով, որ երկու երկրների միջև վիճելի հարցերը պաշտոնական Թեհրանը պատրաստ է լուծել դիվանագիտական ճանապարհով:
Քանանիի խոսքով՝ ամբիոնի ետևում հնչող հայտարարությունները, հատկապես վիճահարույց հարցերի վերաբերյալ, չեն նպաստում դրանց լուծմանը։
«Միակողմանի խոսակցությունները ճշմարտության սահմաններում չեն, և մենք պետք է փորձենք, որ խոսակցությունները տեղի ունենան սահմանված շրջանակներում։ Մեր շեշտը դրված է բարիդրացիության պահպանման վրա, և չպետք թույլ տալ, որ օտար ուժերը լարվածություն առաջացնեն երկու երկրների հարաբերություններում»,- հավելել է Իրանի ԱԳՆ խոսնակը։
Հետևեք մեզ տելեգրամում
