Սիրիայի նպատակն է վերջ տալ երկրում անօրինական ռազմական ներկայությանը՝ այդ թվում թուրքական զինված ուժերի: Այս մասին հայտարարել է Սիրիայի արտգործնախարար Ֆեյսալ Միկդադը՝ Ռուսաստանի, Սիրիայի, Իրանի և Թուրքիայի ԱԳ նախարարների՝ Մոսկվայում կայացած քառակողմ հանդիպման ժամանակ:
«Առանց այս հարցի շուրջ առաջընթացի՝ մենք որևէ իրական արդյունքի չենք հասնելու: Շարունակելու ենք աշխատել, պահանջել և պնդել [խմբ.՝ զինված ուժերի] դուրսբերման խնդիրը»,- Սիրիայի արտգործնախարարի խոսքերը մեջբերում է սիրիական պետական SANA լրատվամիջոցը:
«Սիրիան և Թուրքիան երկար սահմաններ ունեն, ընդհանուր շահեր և նպատակներ: Մենք տեսնում ենք, որ, չնայած նախորդ տարիների բացասական կողմերի, մեր երկու ընկերների՝ Ռուսաստանի և Իրանի աջակցությամբ հնարավորություն կա միասին աշխատել՝ հասնելու այս նպատակներին և շահերին այնպես, որ դրանք ծառայեն երկու երկրների ժողովուրդների ձգտումներին»:
Նշենք, որ այսօր Մոսկվայում մեկնարկել է Ռուսաստանի, Իրանի, Սիրիայի և Թուրքիայի արտգործնախարարների քառակողմ հանդիպումը: Հանդիպման պայմանավորվածությունը ձեռք էր բերվել դեռևս նախորդ ամիս՝ պաշտպանության նախարարների մակարդակով կայացած հանդիպման արդյունքում:
Հետևեք մեզ տելեգրամում
