ԵՄ-ի միջնորդությամբ մայիսի 14-ին տեղի ունեցած Միշել-Ալիև-Փաշինյան եռակողմ հանդիպման նպատակն առաջին հերթին Բրյուսելյան հարթակի կենսունակությունն ապահովելն է: Նման տեսակետ է հայտնել տարածաշրջանային հարցերով փորձագետ Արմեն Պետրոսյանը:
Փորձագետի խոսքով՝ Բրուսելյան հարթակի, անգամ խորհրդանշական գոյությունը բխում է Բաքվի շահերից։ նա նաև հավելել է, որ Բրյուսելյան հարթակի արդյունավետությունը վիճարկել էր հայկական կողմը 2022թ. սեպտեմբերին ադրբեջանական ագրեսիայի պատճառով, որն արձանագրվեց այս հարթակում վերջին հանդիպումից ընդամենը 2 շաբաթ անց։
Պետրոսյանի համոզմամբ՝ ԵՄ-ն չի կարողանալու լիարժեքորեն ապահովել սեփական հարթակում ձեռք բերված պայմանավորվածությունները շատ պարզ պատճառով, քանի որ, ի տարբերություն, Ռուսաստանի, ԱՄՆ-ի, անգամ Ֆրանսիայի, չունի անհրաժեշտ մեխանիզմներ։ նա նկատել է, որ առավելագույնը, ինչ կարելի սպասել Բրյուսելում ձեռք բերված պայմանավորվածություններից, մեր դեպքում սահմանափակ թվով ռազմագերիների վերադարձի հնարավորությունն է ադրբեջանցի զինծառայողների փոխանակման պայմաններում։
Փորձագետը նկատել է, որ հայկական կողմից շարունակվում է Բրյուսելյան հարթակի վիճարկման ուղղությունը:
«Այդ մասին կարելի է եզրակացնել նախ Ադրբեջանի, Հայաստանի ներկայացուցիչների հանդիպումների հերթականությունից՝ անգամ Միշելի հայտարարության տեքստից։ Նախ, Երևանը հրաժարվել էր Բրյուսելի հերթական հանդիպումից դեռևս անցյալ տարեվերջին, երբ Ադրբեջանը հրաժարվել էր ԵՔՀ շրջանակում «պրահյան քառակողմ» հանդիպման օրինակով Բրյուսելյան ձևաչափի վերափոխման հնարավորությունից»,- Facebook-ի իր էջում գրել է Պետրոսյանը:
Փորձագետի կարծիքով՝ Հայաստանը համաձայնում է Բրյուսելում հանդիպմանը՝ ի պատասխան Ադրբեջանի կողմից դարձյալ ԵՔՀ շրջանակում Քիշնևում ծրագրված վեցակողմ հանդիպման մասնակցության։
«Մյուս կողմից, Միշելը հայտարարում է հուլիսին Բրյուսելում հաջորդ հնարավոր հանդիպման մասին՝ զուգահեռաբար ակնարկելով Գրենադայում հոկտեմբերին կայանալիք ԵՔՀ հերթական գագաթնաժողովին ևս ընդլայնված ձևաչափով բանակցություններին»,- եզրափակել է Պետրոսյանը:
Հետևեք մեզ տելեգրամում
