Ճակատագրական պահին Իրանը կցուցադրի իր խաղաքարտերը. իրանցի փորձագետը՝ «Զանգեզուրի միջանցքի» մասին

Ադրբեջանն ու Թուրքիան թող չկարծեն, թե իր շահերի սպառնալիքների նկատմամբ Իրանի համբերությունն անսահման է: Ճակատագրական պահին Իրանը կցուցադրի իր խաղաքարտերը: Նման համոզմունք է հայտնել իրանցի միջազգայանգետ Էհսան Մովահեդիանը՝ Irdiplomacy վերլուծական կայքում հրապարակված հոդվածում:

Հոդվածում Մովահեդիանն անդրադարձել է «Զանգեզուրի միջանցքին» և Իրանի համար դրա հետևանքներին:

Փորձագետը նաև շեշտել է Իրանի տարանցիկ ուղիները դիվերսիֆիկացնելու և Ադրբեջանի ու Թուրքիայի երթուղիներից կախվածությունը նվազեցնելու, ինչպես նաև Չինաստանի, Ռուսաստանի, Հնդկաստանի հետ համագործակցության խորացման անհրաժեշտությունը:

Ադրբեջանն ու Թուրքիան թող չկարծեն, թե իր շահերի սպառնալիքների նկատմամբ Իրանի համբերությունն անսահման է: Ճակատագրական պահին Իրանը կցուցադրի իր խաղաքարտերը, ինչպես որ արել է Սիրիայում, Եմենում, Իրաքում»,- նշել է Մովահեդիանը:

Ըստ փորձագետի՝ Թուրքիայի և Բաքվի ղեկավարները «Անգլիայի և սիոնիստների աջակցությամբ» ձգտում են փոխել Կովկասի և Արևմտյան Ասիայի աշխարհագրական սահմանները և անկայունություն ստեղծել Սիրիայում, Իրաքում, Լիբանանում և Հայաստանում, որպեսզի Իրանի համար աշխարհաքաղաքական, տնտեսական ու անվտանգային խոչընդոտներ ստեղծեն։