Իրանական «Rahbordemoaser» տեղեկատվական-վերլուծական կայքում հոդված է հրապարակվել Իսրայելի պաշտպանության նախարարի՝ Ադրբեջան կատարած այցի մասին։
Հոդվածի մեկնարկային մասում նշվել է, որ Իսրայելի պաշտպանության նախարարի այցը տեղի է ունեցել այն ժամանակ, երբ Բաքվի անվտանգության ծառայությունը լուր էր հրապարակել՝ պնդելով, որ ձերբակալվել է Աֆղանստանի մի քաղաքացի, ով պատրաստվում էր հարձակում գործել «սիոնիստական ռեժիմի» դեսպանատան վրա։
Ընդգծվել է, որ Իսրայելի գլխավոր նպատակն է վնասել Իրանի երկկողմ հարաբերություններն իր հարևանների հետ և խեղաթյուրել Իրանի իմիջը լրատվամիջոցների և հասարակական կարծիքի շրջանում։
«Մինչ այժմ Իրանի կառավարությունը պահանջում էր նվազեցնել լարվածությունը և բարելավել հարաբերությունները Բաքվի հետ՝ հիմնվելով փոխադարձ հարգանքի և տարածքային ամբողջականության սկզբունքի վրա, սակայն Ալիևի կառավարության պահվածքը ցույց է տալիս հակաիրանական քաղաքականությունը շարունակելու այս երկրի մտադրությունը։
Բաքվի անբարյացակամ պահվածքի կրկնվելու դեպքում Իրանը կարող է հակաքայլեր ձեռնարկել՝ զինելով Երևանին բոլոր տեսակի պաշտպանական զինատեսակներով՝ Հարավային Կովկասում ուժերի հավասարակշռություն հաստատելու համար»,- շեշտվել է հոդվածում:
Հոդվածում տեսակետ է ներկայացվել այն մասին, թե Իսրայելի ՊՆ ղեկավարի այցը Ադրբեջան և հանդիպումը Բաքվի ռազմաքաղաքական վերնախավի հետ վկայում են Հայաստանի դեմ նոր ռազմական գործողություն մեկնարկի պլանավորման և Իրանի հետ ընդհանուր սահմանին հավասարակշռություն ստեղծելու մասին։
Հետևեք մեզ տելեգրամում
