Իրանը բազմիցս նախագահ Էբրահիմ Ռայիսիի, ԱԳ նախարար Հոսեյն Ամիր Աբդոլլահիանի միջոցով հայտնել է, որ «Զանգեզուրի միջանցքը» մնում է «կարմիր գիծ», և անընդունելի է Իրանի և Հայաստանի միջև մի քանի հազար տարվա սահմանի փոփոխությունը։ Նման տեսակետ է ներկայացվել իրանական «Tahlilbazaar» կայքում հրապարակված հոդվածում:
Հոդվածում անդրադարձ է կատարվել իրանա-թուրքական հարաբերություններին և դրանցում առկա լարվածությանը:
Կայքը հիշեցրել է, որ Թուրքիայի նախագահ Ռեջեփ Էրդողանը Բաքու կատարած այցից հետո հայտարարել է, թե «Զանգեզուրի միջանցքի» գործարկման հիմնական խոչընդոտը ոչ թե Երևանն է, այլ Թեհրանը։
Ընգծվել է, որ Ռուսաստանն այժմ ստիպված է Ուկրաինայում աշխարհաքաղաքական առճակատման մեջ մտնել Արևմուտքի հետ, հետևաբար շահագրգռված է պահպանել գործընկերությունը Թուրքիայի հետ՝ մեկուսացումից դուրս գալու համար։
«Ուստի Ռուսաստանը չի կարող լարել հարաբերությունները Անկարայի հետ կովկասյան տարածաշրջանում։ Արդյունքում Իրանը դառնում է Թուրքիայի գլխավոր հակառակորդն այս ճակատամարտում»,- նշվել է հոդվածում:
Կայքը գրել է, որ ընթացիկ տարեսկզբից Իրանի և Թուրքիայի միջև ապրանքաշրջանառության ծավալը փոքր-ինչ նվազել է, սակայն տնտեսական հարաբերությունների անկումը պայմանավորված է մի քանի օբյեկտիվ և սուբյեկտիվ պատճառներով, այդ թվում՝ Ռուսաստանի դեմ պատժամիջոցների հետևանքով էներգետիկ շուկայի ճգնաժամը, երկրաշարժը և գնաճը Թուրքիայում, թուրքական լիրայի արժեզրկումը և Անկարայի ճնշումը «Զանգեզուրի միջանցքի» վրա։
Հետևեք մեզ տելեգրամում
