Երեկ Իրանում Սաուդյան Արաբիայի նորանշանակ դեսպան Աբդուլլահ բին Սաուդ Ալ-Անազին ժամանել է Թեհրան՝ սկսելու դիվանագիտական ծառայությունը: Այս մասին հաղորդում է սաուդական պետական լրատվամիջոցը:
Թեհրան ժամանելուն պես նորանշանակ դեսպանը հայտարարել է, որ Սաուդյան Արաբիայի ղեկավարության հրահանգները ներառում են երկու երկրների միջև հարաբերությունների ամրապնդումը, ինչպես նաև երկկողմ շփումների ու հանդիպումների ակտիվացման կարևորությունը:
Նա հավելել է, որ Սաուդյան Արաբիան ձգտում է երկու հարևան երկրների միջև հարաբերությունները տեղափոխել ավելի լայն հորիզոններ՝ հաշվի առնելով, որ նրանք ունեն տնտեսական բաղադրիչներ, բնական ռեսուրսներ և առավելություններ, որոնք նպաստում են տարածաշրջանում զարգացման, բարգավաճման, կայունության և անվտանգության բարձրացմանը:
Հիշեցնենք, որ Իրանի և Սաուդյան Արաբիայի միջև դիվանագիտական հարաբերությունները վերականգնվել են սույն թվականի մարտին՝ գրեթե մեկ տասնամյակ ձգվող դադարից հետո: Երկկողմ հարաբերությունների մերձեցումն իրականացվել է Չինաստանի միջնորդությամբ:
Հետևեք մեզ տելեգրամում
