ԱՄՆ պետքարտուղարության խոսնակ Մեթյու Միլերը հայտարարել է, որ USAID-ի տնօրեն Սամանթա Փաուերը և պետքարտուղարի տեղակալի պաշտոնակատար Յուրի Քիմն այսօր Ադրբեջանում են, որտեղ նրանք շեշտել են այն նույն կետերը, որոնք ընդգծել է պետքարտուղարը Ալիևի հետ իր հեռախոսազրույցում:
«Առաջին, մենք ցանկանում ենք տեսնել հրադադարի պահպանում: Երկրորդ, մարդասիրական կարիքների ապահովում: Դա նշանակում է բաց պահել Լաչինի միջանցքը և ապահովել, որ մարդասիրական բեռները կարողանան մուտք գործել: Դա նաև նշանակում է միջազգային դիտորդական առաքելություն՝ վստահ լինելու համար, որ մարդասիրական կարիքներն ապահովվում են:
Ես կնշեմ, որ մենք ողջունել ենք Ադրբեջանի կառավարության արտահայտած մեկնաբանություններն այդ առիթով։ Քիչ առաջ նախքան այստեղ գալը, նրանք ողջունեցին նման միջազգային դիտորդական առաքելությունը։ Դա մի բան է, որ պետքարտուղարն ուղիղ պնդել է նախագահի հետ զրույցում, և մենք ուրախ ենք տեսնել, որ նա համաձայնել է դրան: Մենք կաշխատենք մեր դաշնակիցների և գործընկերների հետ առաջիկա օրերին՝ հստակեցնելու, թե ինչպիսին է լինելու այդ առաքելությունը:
Բացի այդ, ի վերջո, մենք ուզում ենք տեսնել վերադարձ բանակցությունների սեղան, որտեղ նրանք կարող են հասնել արժանապատիվ, տևական խաղաղության»,- ճեպազրույցի ժամանակ հայտարարել է խոսնակը:
Նա հիշեցրել է, որ Վաշինգտոնը մեծ ջանքեր է գործադրել կողմերի միջև խաղաղության հաստատման ուղղությամբ:
«Սակայն ի վերջո, նրանք պետք է համաձայնվեն խոսեն միմյանց հետ և հանգեն ինչ-որ կարգավորման: Դա այն է, ինչ մենք պատրաստվում ենք անել՝ շարունակել խաղալ մեր դերը՝ այս գործընթացին աջակցելու համար»։
Անդրադառնալով վերջին շրջանում Ռուսասատնի ունեցած դերին, նա նշել է.
«Իհարկե, չեմ կարծում, որ Ռուսաստանն այստեղ արդյունավետ դեր է խաղացել անցած շաբաթվա ընթացքում։ Եղել են պահեր, երբ մենք ականատես ենք եղել, որ նրանք նպաստել են բանակցություններին, և մենք ողջունել ենք դա, բայց, անշուշտ, վերջին շաբաթվա ընթացքում նրանց դերն արդյունավետ չի եղել այս իրավիճակում»:
Նա նաև անդրադարձել է Ռուբեն Վարդանյանի ձերբակալմանը, նշելով. «Մենք տեղյակ ենք: Ուշադիր հետևում ենք իրավիճակին: Այսօր այլ մեկնաբանություն չունեմ»,- եզրափակել է Մեթյու Միլլերը:
Հետևեք մեզ տելեգրամում
