Իսրայելի վարչապետ Բենյամին Նեթանյահուն հայտարարել է, որ Իսրայել ժամանող բոլոր անձինք պետք է կարանտին անցնեն, որպեսզի նվազեցնեն կորոնավիրուսի տարածման ռիսկը:
«Արտասահմանից Իսրայել ժամանող բոլոր անձինք կմեկուսացվեն»,-հայտարարել է Նեթանյահուն:
Իսրայելի ներքին գործերի նախարար Արյե Դերին տեղեկացրել է, որ որոշումը բոլոր իսրայելցիների համար ուժի մեջ է մտնում անհապաղ՝ երկիր վերադառնալուն պես, իսկ Իսրայել ժամանած արտասահմանցիների համար, այն ուժի մեջ կմտնի մարտի 12-ից: Նշվում է, որ Իսրայել ժամանող արտասահմանցիները պետք է ապացուցեն, որ կարանտինում մնալու համար իրենք կացարան ունեն Իսրայելում:
«Բարդ քննարկումներից հետո մենք որոշել ենք, որ Իսրայել ժամանող ցանկացած անձ 14 օրով պետք է մեկուսացվի: Սա բարդ որոշում էր, սակայն այն կարևոր է հասարակական առողջապահության պահպանման համար, իսկ դա առաջնային խնդիր է»,-հայտարարել է Իսրայելի վարչապետը:
Որոշումը ենթադրում է, որ ներկայում արտասահմանում գտնվող Իսրայելի շուրջ 268 000 քաղաքացիներ վերադառնալուն պես պետք է մեկուսացվեն:
Իսրայելի ընդհանուր բնակչությունը շուրջ 9 մլն է, ներկայում երկրում գրանցվել է կորոնավիրուսով վարակման 42 դեպք, մահվան դեպքեր չկան:
Իսրայելն արդեն սահմանափակումներ է մտցրել մի քանի երկրից ժամանող անձանց համար, այդ երկրների թվում է Իտալիան, որը կորոնավիրուսի վարակման դեպքերի քանակով առաջատարն է Եվրոպայում:
Կորոնավիրուսի համաճարակի մասին Չինաստանի իշխանություններն ԱՀԿ-ին հայտնել էին դեկտեմբերի 31-ին: Հայտնի է, որ վիրուսը տարածվել է Չինաստանի Ուհան քաղաքից: Չինաստանի սահմաններից դուրս վարակների մեծ մասը հայտնաբերվել է Հարավային Կորեայում, Իրանում և Իտալիայում: Ընդհանուր առմամբ, վարակի դեպքեր են հաստատվել ավելի քան 80 երկրում: Առողջապահության համաշխարհային կազմակերպությունը հայտնում է, որ ամբողջ աշխարհում գրեթե 100 000 մարդ վարակվել է կորոնավիրուսով։
Հետևեք մեզ տելեգրամում
