Իսպանիան մինչև հուլիս կճանաչի Պաղեստինի պետությունը: Տեղեկությունը հայտնում են մի շարք իսպանական ԶԼՄ-ներ՝ հավելելով, որ այս մասին լրագրողներին ասել է Իսպանիայի վարչապետ Պեդրո Սանչեսը:
Իսպանական մի շարք ԶԼՄ-ներ վկայակոչում են, որ Իսպանիայի վարչապետը նման հայտարարություն է արել Հորդանանի մայրաքաղաք Ամմանում՝ մերձավորարևելյան այցի շրջանակներում:
Ըստ տեղեկությունների՝ Իսպանիայի վարչապետն ակնկալում է, որ իրադարձությունները ավելի պարզ կդառնան հունիսի սկզբին՝ Եվրախորհրդարանի ընտրություններին ընդառաջ:
Սանչեսն ակնկալում է, որ «Իսպանիան կճանաչի պաղեստինցիներին մինչև հուլիս»: Նրա կարծիքով՝ շուտով Եվրամիության ներսում ի հայտ կգա «մասսայական զանգված», որը կդրդի այլ անդամ երկրների ևս նման դիրքորոշման գալ:
Al Arabiya-ն գրում, է, որ ավելի վաղ Եվրոպական խորհրդի նիստում Իսպանիայի վարչապետը հայտնել էր, որ պայմանավորվել է Իռլանդիայի, Մալթայի և Սլովենիայի ղեկավարների հետ «առաջին քայլերն անել» Հորդանան գետի Արևմտյան ափում և Գազայի հատվածում պաղեստինցիների կողմից հռչակված պետականությունը ճանաչելու ուղղությամբ:
Ի պատասխան այս ամենի՝ Իսրայելը հայտարարել է, որ վերոնշյալ ծրագիրը հանդիսանում է «ահաբեկչության մրցանակ», որը կնվազեցնի Գազայի հակամարտությունը բանակցային ճանապարհով լուծելու հնարավորությունները:
Ուշագրավ է, որ 1988 թվականից ի վեր ՄԱԿ-ի 193 անդամ երկրներից 139-ը ճանաչել են Պաղեստինի պետությունը։
Հետևեք մեզ տելեգրամում
