ՀՀ վարչապետ Նիկոլ Փաշինյանը հանդիպել է Իրանի նախագահի ժամանակավոր պաշտոնակատար Մոհամմադ Մոխբերի հետ։ Տեղեկությունը փոխանցում է իրանական ISNA լրատվամիջոցը:
Հանդիպման ընթացքում Մոխբերը նշել է, որ Իրանի արտաքին քաղաքականության ռազմավարությունը չի փոխվելու և շարունակվելու է։
«Մենք հավատարիմ ենք մնալու Հայաստանի հետ մեր բոլոր պարտավորություններին ու պայմանավորվածություններին և լրջորեն հետևելու ենք դրանց կատարմանը»,-շեշտել է Մոխբերը։
Նիկոլ Փաշինյանը ցավակցություն է հայտնել և ընդգծել, որ իր այցը պայմանավորված է առաջին հերթին նախագահ Էբրահիմ Ռայիսիի և ԱԳ նախարար Հոսեյն Ամիր Աբդոլլահիանի հետ իր մտերիմ և անձնական հարաբերություններով։
Նա հայտարարել է, որ երկու երկրները շատ լավ պայմանավորվածություններ են ունեցել միմյանց հետ Ռայիսիի նախագահության տարիներին, ինչը շատ հստակ հեռանկար է ստեղծել երկկողմ հարաբերությունների մակարդակի բարձրացման համար՝ հավելելով, որ Հայաստանի կառավարությունը լիովին հավատարիմ է այդ պայմանավորվածությունների իրականացմանը։
«Հուսով եմ, որ երկար տարիներ մենք միմյանց հետ միշտ կունենանք անկեղծ, բարեկամական և ընդլայնվող հարաբերություններ»,- ասել է ՀՀ վարչապետը։
Հետևեք մեզ տելեգրամում
